Beləliklə, Misli premyer-liqasında mövsüm yarılanda, 2-ci dövrəyə də yekun vuruldu.

Komandalar qış fasiləsinə yollandığından ilin son matçı hər kəs üçün vacib əhəmiyyət daşıyırdı. Ümumiyyətlə, xal fərqinin də az olması nəticəsində turnir cədvəlində xeyli dəyişiklik baş verdi.

Bölgələrdə sürpriz, paytaxtda gözlənilən nəticələrin qeydə alındısa, “Səbail” gərgin Sumqayıt səfərindən üzgün qayıtdı.

“Qəbələ”nin “doğma divarlar arası”nda “Sabah”ı minimum hesabla məğlub etməsi Masazır təmsilçisi üçün fiasko idi. Baş məşqçi Murad Musayev də bunu dərk etdi ki, nəhayət, “ağ bayraq qaldırdı”. Boş vədlər vermək əvəzinə gücsüzlüyünü etiraf etmək də mədəniyyətdi. Elmar Baxşıyevin dediyindən anlaşıldı ki, “qırmızı-qaralar”ı sonuncu sıradan xilas etməkdə inadlıdı. “Turan Tovuz” – “Araz-Naxçıvan” oyunu da maraqla gözlənilirdi. “Bozqurdlar” ilk dövrədə bu rəqibi darmadağın etmişdi (3:0). Lakin ardından Muxtar Respublika təmsilçisi daha iddialı çıxış etdiyindən aşkar favoriti müəyyənləşdirmək çətin idi. Azər Bağırovun komandası bu dəfə üç qoldan, sadəcə, birini cavabladı. Məğlubiyyət naxçıvanlılara baha başa gəldi. İni onlar 6-cı sırada məhz bu rəqiblə qonşudu. “Sumqayıt” – “Səbail” oyunu ciddi rəqabət şəraitində keçdi. Mehremiçin avtoqoluna sevinən “kimyaçılar” fasiləyə “ilk 4-lük”də yollandı. Əlbəttə, Şahin Diniyev “gənclik şəhəri”nə məğlubiyyət dalınca getməmişdi. Oyun daha az səhv edənin qələbəsiylə bitməliydi ki, belə də oldu. Ümumiyyətlə, 18-ci tur premyer-liqanın “Araz-Naxçıvan”, “Səbail” və “Sabah” kimi iddialılarına düşərli olmadı.

Əvəzində “Neftçi” son turda sevindi. “Ağ-qaralar” əzəli rəqiblərindən “Kəpəz”i məğlub etdi. 2 cavabsız qol və baxımlı oyun həm rəhbərlik, həm də azarkeşlər üçün dərman oldu. Düzdü, 3-cü sırada qərarlaşan bakılılar çempionluq hədəfindən əl çəkdiyini, demək olar ki, etiraf edib. Amma gümüş medala ümid etmək indi daha rahatdı. İlin son matçı Zirədə keçirildi. Qəsəbənin eyniadlı təmsilçisi “Qarabağ” sınağından üzüağ çıxa bilmədi - 0:1. Növbəti 3 xal qış çempionunu əlçatmazlığa doğru bir addım daha yaxınlaşdırdısa, “qartallar”ın ikinciliyi təhlükə altına düşdü. İndi Rəşad Sadıqovun komandası “Neftçi”inin isti nəfəsini kürəyində hiss edir. Ümumiyyətlə, mövsümün 2-ci yarısı üçün mübarizənin axarını proqnozlaşdırmaq çətin deyil. Həmişə olduğu kimi, yenə də “Qarabağ”a çatmaq çətin olacaq. 2-ci yer uğrunda isə birdən-birə 5 komanda – “Zirə”, “Neftçi”, “Sumqayıt”, “Səbail”, “Araz-Naxçıvan” mübarizə aparacaq.

Misli premyer-liqası
2-ci dövrə, 18-ci tur
22 dekabr
Qəbələ - Sabah 1:0
23 dekabr
Turan Tovuz – Araz-Naxçıvan 3:1
Sumqayıt – Səbail 1:0
24 dekabr
Neftçi – Kəpəz 2:0
Zirə - Qarabağ 1:0
1. Qarabağ 18 13 2 3 45-14 41
2. Zirə 18 8 5 5 13-10 29
3. Neftçi 18 8 4 6 21-17 28
4. Sumqayıt 18 7 6 5 19-23 27
5. Səbail 18 7 5 6 26-27 26
6. Araz-Naxçıvan 18 7 5 6 20-19 26
7. Turan Tovuz 18 6 4 8 29-28 22
8. Sabah 18 6 4 8 25-22 22
9. Kəpəz 18 3 5 10 11-29 14
10. Qəbələ 18 4 2 12 12-32 14
Bombardirlər: Olavio Juninyo (Qarabağ) – 13, Aleksandr Ramalinqom (Səbail) – 7.
Növbəti turun oyunları yanvarın 21-23-də keçiriləcək: “Qarabağ” – “Araz-Naxçıvan”, “Kəpəz” – “Turan Tovuz”, “Səbail” – “Zirə”, “Sabah” – “Neftçi”, “Qəbələ” – “Sumqayıt”.

KƏNAN BAHADIR