“2024 Azərbaycan futbolu üçün o qədər də düşərli il olmadı. Klublarımız fiaskoya uğradı, yığmalarımız da bizi sevindirə bilmədi. İlin əvvəli bir qədər uğurlu gəlsə də, ümumən uğursuz il saymaq olar. Fiasko yaşadıq. Arzulayardıq ki, daha yaxşısı olsun. Amma çempionatımız uşaq futbolunun vəziyyətini göstərmək üçün bariz nümunə oldu. Akademiyalarda işin düzgün getməməsi, uşaq futbolundakı problemlər çempionatda futbolçu çatışmazlığına gətirib çıxardı. Futbol veteranları futboldan kənarda qaldı. Ümumilikdə 2024-cü ilin nə iləsə yadda qaldığını demək də çox çətindi. Amma ümidimiz böyükdü. Çalışmaq lazımdı ki, akademiyalarımız işini bərpa etsin, yaxşı futbolçular versin. Həmçinin sağlam təfəkkürlü, milli ruhda futbolçular yetişdirilsin. Ondan sonra hansısa uğur əldə etmək olar. “Qarabağ”ın ilin əvvəlindəki “Braqa” və “Bayer 04” ilə oyunlarını uğurlu saymaq olar. Konfrans Liqasında “Zirə” pley-offa çıxdı. Ümumi götürəndə illərdi klublara, futbolun inkişafına böyük pullar ayrılır. Dövlət tərəfindən ayrılan büdcə, yaradılan şərait və ali baş komandan tərəfindən verilən dəstək kifayət qədərdi. Amma hələ biz o səviyyədə işlər görə bilmirik. Ona görə də futbolda böyük çatışmazlıqlar var. Hər halda, 2025-də gözləyirəm ki, milli ruhda yetişdirilən futbolçular çoxalsın, ölkəmizə səviyyəli legionerlər gəlsin. Klublarımızın maddi-texniki bazası olmalıdı. Futbolumuz süni ot örtüyündən uzaqlaşmalıdı. Arzulayıram ki, 2025 futbolumuz üçün inqilabi il olsun. Klublarımız qitə turnirlərinin qrup mərhələlərində daha çox iştirak etsin. Milli komandalarımızda bütün yaş qrupları yerli akademiyaların uşaqlarından təşkil olunsun. Dünya idmanında bütün növlərdə sözümüzü deyirik. Hər halda, bizim də dövrümüz çatıb ki, qarşıdan gələn ili Futbol ili elan edək, klublarımız yüksək səviyyədə inkişaf etsin. Veteran futbolçular işlə təmin olunmalıdı. Yəni onlar klubın Müşahidə Şurasında yer almalı, onların da tövsiyələri eşidilməlidi. Azərbaycan xalqını Yeni il münasibəti ilə təbrik edirəm. Qarşıdakı ildə futbolumuz, idmanımız daha da çiçəklənsin, daha uğurlu nəticələr əldə olunsun. Biz də baxıb fəxr edək”.