“Futbol adına 2024-ün ən yaddaqalan hadisəsi növbəti hesabat-seçki konfransının keçirilməsi oldu. Uzun illərdən sonra AFFA rəhbərliyində strateji vəzifələrə yeni adlar gəldi. Qalaq-qalaq yığılmış problemləri qısa vaxtda aradan qaldırmaq mümkün olmasa da, strateji yanaşmada, kadr islahatlarında operativlik göstərilməliydi. İndiki futbol sistemsizliyində rahatlıq, məsuliyyətin mənəvi və faktiki dərk edilməməsi qəbuledilməzdi. AFFA-da dəyişiklərdən sonra futbol ictimaiyyəti arasında müəyyən ümidlər yaransa da, pərakəndəlik, qərarsızlıq fonunda inam azalmağa başladı. Millətlər Liqasında D-yə yuvarlanmaq son pillə oldu. Futbol həvəskar yanaşmanı, zarafatı sevmir. İnanmaq istərdim ki, bütün bunlar dərs olacaq. Yeni ildə xalqmıza ən xoş arzularımı çatdırıram.Yuxarıda qeyd etdiyim kimi, Azərbaycan futbolu elə durumdadı ki, eksperimentlərə yer olmamalıdı. Bütün addımlar, qərarlar ölkə futbolu adına zərgər dəqiqliyi ilə tənzimlənməli, doğru seçimlər edilməli, görüləcək işlərə kompleks yanaşılmalı, özünü doğrultmuş, vətəni, xalqı sevən, milli ruhu olan bacarıqlı mütəxəssislərə şərait yaradılmalı, futbol sistemi keyfiyyəti təmin edəcək işlək mexanizm, konveyer kimi çalışmalıdı. Ancaq bu halda Azərbaycan futbolu dirçələ, istənilən səviyyəyə yetişə bilər”.