Mahir Emrelinin performansında eniş davam edir. Almaniyanın 2-ci bundesliqasında çıxış edən "Nürnberq"in şərəfini qoruyan həmyerlimiz son matçlarda bizi sevindirə bilmir.

Hücumçu komandasının 17-ci tur çərçivəsində Braunşveyq "Ayntraxt”ını qəbul etdiyi matçın (1:0) start heyətində yer almadı. Baş məşqçi Miroslav Kloze Mahirin xidmətinə yalnız 78-ci dəqiqədən sonra ehtiyac duydu ki, o, Stefanos Tzimasın əvəzinə meydana çıxdı. Təbii ki, bu, Mahirin "Nürnberq"dəki statistikasına təsirsiz ötüşməyib.

"Football-plus.az" xəbər verir ki, bu barədə məlumat "Kicker"in mövsümlük statistika bölməsində yer alıb. Belə ki, Mahir sonuncu oyunda cəmi bir qapıya zərbəylə yadda qalıb. 13 dəqiqə ərzində bir təkbətək mübarizədən qalib ayrılıb. Hansısa hava duelinə qoşulmayıbsa, bir dəfə ofsayda düşüb.
Bilindiyi kimi, maliyyə böhranıyla üzləşən "Nürnberq" qış fasiləsində bir neçə aparıcı oyunçusunu satmağa və icarəyə verməyə hazırlaşır. Odu ki, Mahirin indiki məqamda yaşadığı eniş heç də yaxşı əlamət deyil. Hələ Almaniya mətbuatının Emrelinin baş məşqçisiylə münaqişə yaşadığını tirajlamasını da unutmamalıyıq.

Görünür, həmyerlimiz üçün təhlükə qapıdadı. Hətta o, qış fasiləsində "Nürnberq"dən ayrılsa, təəccüblənməyək...

KƏNAN BAHADIR