"Nürnberq" bu gün Almaniyanın 2-ci bundesliqasının 14-cü turu çərçivəsində meydana çıxıb.

"Football-plus.az" xəbər verir ki, Mahir Emrelinin komandası "doğma divarlar" arasında "Düsseldorf"la heç-heçə edib - 2:2. Start heyətində yer alan həmyerlimiz 74-cü dəqiqədə Lukas Şmeltserlə əvəzlənib. Bəs o, meydanda qaldığı müddətdə nə ilə qalıb?

İlk dəqiqələrdən fəal çıxışla diqqəti çəkən Emreli üç dəfə komandasını qolla sevindirməyə, iki dəfə məhsuldar ötürmə verməyə yaxın olub. "Nürnberq"in ilk təhlükəli vəziyyətini 12-ci dəqiqədə Mahir yaratsa da, rəqibin qapıçısıyla mübarizədən məğlub ayrılıb. 28-ci dəqiqədə cərimə meydançasına daxil olan hücumçu Stefanos Tzimasa ötürmə verib, amma komanda yoldaşının başla qapıya zərbəsi qeyri-dəqiq olub. 39-cu dəqiqədə Mahir Yulian Yustvanın hiyləgər ötürməsini qeyri-dəqiqlik üzündən qolla tamamlaya bilməyib. Həmçinin Mahir təkbətək mübarizələrin 81 faizindən qalib ayrılıb. O, dörd hava duelinin ikisində rəqibini üstələyibsə, bir dəfə əllə oynayıb. Daha iki dəfə isə fərqli qayda pozuntularına yol verib. Hər halda, həmyerlimiz vərəqə almayıb. Deməli, indiyə qədər üç dəfə "sarı"yla üzləşən Mahir növbəti matçda baş məşqçisi Miroslav Klozenin sərəncamında olacaq.

Ümumiyyətlə, matçın birinci hissəsi meydan sahiblərinin, ikinci hissəsi isə qonaqların üstünlüyü şəraitində keçib. Maraq üçün qeyd edək ki, "Nürnberq" qələbəni 90-cı dəqiqədə Yustvanın avtoqolu üzündən əldən verib. Mahirin komandası 19 xalla 12-ci yerdədi. “Nürnberq” dekabrın 6-da 15-ci tur çərçivəsində "Elversberq"in qonağı olacaq.

KƏNAN BAHADIR