Nürnberq” 16-cı turda “Köln”ün meydanından məğlub ayrıldı – 1:3. Bununla da komandanın qələbə həsrəti 6 oyuna çatdı! Bizi maraqlandıran məqam isə Mahir Emrelinin taleyidi.

“Football-plus.az” xəbər verir ki, hücumçu bu oyunda da fərqlənməməklə ardıcıl 5 oyunda qol və məhsuldar ötürmə statistikasını yaxşılaşdıra bilmədi. Hələ bu harasıdı?! O, ilk dəfə meydanda cəmi 45 dəqiqə qaldı! Emreli indiyə qədər azı 51 dəqiqə top qovmuşdu ki, bu, futbolçunun “Nürnberq”də debüt etdiyi matça təsadüf etmişdi. Kor-kor, gör-gör, Mahir geriləyir... Oyundan-oyuna daha sürətlə...

İddiamız təkcə yuxarıda qeyd olunanlara əsaslanmır. “Kicker”in yayınladığı statistika da var.

Mahir “Köln”lə oyunda yalnız qapıya iki zərbə ilə yadda qaldı. Bir dəfə də məhsuldar ötürmə müəllifi olmağa yaxın oldu. Bizi məyus edən göstəricilərdən biri də Emrelinin oyun ərzində cəmi 5,46 km məsafə qət etməsidi. Ümumiyyətlə, o, meydanda fəallıq nümayiş etdirməyib. Mahir 8 təkbətək mübarizənin altısından və bir hava duelindən qalib ayrılıb. Uğurlu driblinqlərinin sayı ikidi. Qısası, son oyunlarda yaşanan eniş Mahirin ümumi göstəricilərinin pisləşməsiylə nəticələnib. İndi onun mübarizlik dərəcəsi 25 faizdi. Halbuki dekabrın 7-də bunun 33 faiz olduğunu yazmışdıq.

“Nürnberq”in baş məşqçisi Miroslav Klozenin komandadan ayrılmasını istədiyi futbolçuların adını klub rəhbərliyinə təqdim etdiyini yazmışdıq. Əfsanəvi hücumçu həmin siyahıya Mahiri də əlavə edibsə, onu qınaya bilərikmi? İnsafən, yox!

KƏNAN BAHADIR