“Betis”lə oyunda iki dəfə önə çıxan, ancaq üstünlüyü əldən verən “Barselona” turnir cədvəlinin zirvəsində qərarlaşsa da, bu liderlik şərti xarakter daşıyır.

“Jirona”nı darmadağın edən “Real” itirilməyən xallara görə hamıdan irəlidədi. Hələ inanılmaz ssenari üzrə qələbə qazanan “Atletiko” da kataloniyalılara isti nəfəsini hiss etdirir.

Düşünmək olardı ki, “Malyorka”nı darmadağın edən “Barsa” yeni qələbə seriyasına başlayacaq. Ancaq Flikin komandası yenə də büdrədi. “Barsa” son 5 çempionat oyununun dördündə xal itirib. “Betis” də yaxşı durumda deyil, ancaq liderlə oyuna qeyri-adi motviyasiya ilə çıxdı. Pelleqrininin komandası 4 dəqiqə ərzində 4 künc zərbəsi yerinə yetirdi. Və bu zaman kəsiyində iki təhlükəli vəziyyət yaratdı. Rafinya Dieqo Lyorentenin zərbəsindən sonra topu qapı xəttindən çıxardı, Abdenin zərbəsi zamanı isə Penya komandasını xilas etdi.

Fasiləyə qədər yalnız bir təhlükəli vəziyyət yaradan qonaqlar onu da qola çevirdi. Kundenin ötürməsindən sonra Levandovski fərqləndi. 2-ci hissənin əvvəli də “Betis”in üstünlüyü şəraitində keçdi. 56-cı dəqiqəyə qədər sevilyalılar 4 qol vəziyyətini boşa verdi. Sonradan meydana çıxan De Yonq penaltiyə səbəbkar oldu və Lo Çelso tablodakı rəqəmləri eyniləşdirdi. Yamal qətiyyən heç-heçəyə razı deyildi. Məhz yeniyetmə istedad 82-ci dəqiqədə liderlik keyfiyyəti göstərərək qol təşkil etdi – Torresə yaxın məsafədən topu tora göndərmək qaldı. Ancaq qələbə hesabını qorumaq mümkün olmadı. Əslində “Betis” bu oyunda məğlubiyyətə layiq deyildi.

4-cü uzatma dəqiqəsində Diao dabanı ilə aşağı sol küncə effektli zərbə vurdu. Pelleqrininin əvəzetməsi işə yaradı: həm Diao, həm də ona ötürmə verən Ruibal sonradan meydana çıxmışdı. Bir neçə gün əvvəl “Atletik”ə uduzmaqla “Barsa”ya hədiyyə verən “Real”a bu dəfə kataloniyalılar eyni hədiyyəni verdi. “Ağ şimşəklər” yenə də potensial liderdi...

...çünki onlar səfərdə “Jirona”nı darmadağın etməyi bacardı. “Kral klubu” bir il əvvəl olduğu kimi, yenə də “Montilivi” stadionunda rəqib qapısından üç cavabsız top keçirdi. İlk yarının axarı heç də darmadağından xəbər vermirdi. Yüksək temp təklif edən “Jirona” fasiləyə qədər tempi qorudu. 36-cı dəqiqədə Bellingemlə hesabı açan “Real” 2-ci hissədə operativ şəkildə darmadağını rəsmiləşdirdi. Bellingemin ötürməsindən sonra Arda Gülər fərqi artırdı, bir neçə dəqiqə sonra Mbappe oyunda son nöqtəni qoydu. Beləliklə, “Real” “Barselona”nın büdrəməsindən lazımınca yararlandı. İndi itirilməyən xallara görə məhz madridlilər liderdi.

Hələ “Atletiko”nun da çempionluq ümidi artıb. “Hindular”ın “Sevilya” ilə ev oyununda tamaşaçılar dramatik anlara şahid oldu. Meydan sahibləri oyuna çox fəal başladı – Qrizmann topu tirə vurdu, onun daha bir təhlükəli zərbəsinin qarşısını qapıçı aldı, ancaq De Paul 10-cu dəqiqədə hesabı açdı. Komandalar fasiləyə yollananda hesab artıq 1:2 idi. Lukebaiko 12-ci, Romero 32-ci dəqiqədə Oblakı məyus etdi. 57-ci dəqiqədə “Atletiko”nun vəziyyəti bir qədər də pisləşdi. Xuanlu daha bir qol vurdu. Yəqin ki, həmin vaxt kimsə “Atletiko”nun möhtəşəm geridönüş edəcəyini düşünməzdi. Amma Simeone məhz belə düşünürdü. Qrizmann tezliklə fərqi minimuma endirdi. Baş məşqçi qoldan dərhal sonra Sörlotu, 75-ci dəqiqədə isə Linonu meydana buraxdı. Norveçli üç qol vəziyyətini “dəfn etsə” də, Lino 79-cu dəqiqədə hesabı bərabərləşdirə bildi. Tam öz qapısına doğru sıxılan “Sevilya” heç-heçə hesabını da qoruya bilmədi. 4-cü uzatma dəqiqəsində Linodan ötürmə alan Qrizmann qələbə topunu vurdu.

Turun qalan oyunlarına gəlincə, son 5 oyunda 4-cü qələbəsini qazanan “Real Sosyedad” 6-cı pilləyə yüksəldi. “Vilyarreal”a qalib gələn “Atletik” isə bütün turnirlər çərçivəsində məğlubiyyətsiz seriyasını 11 oyuna çatdırdı. “Selta” “Malyorka” üzərində inamlı qələbə qazandı. “Las Palmas” “Valyadolid”dən, “Rayo Valyekano” “Valensiya”dan üstün oldu. “Osasuna” – “Alaves” oyununda 4 qol vurulsa da, qalib müəyyənləşmədi. “Xetafe” “Espanyol”u məğlub etdi.

16-cı tur
Betis – Barselona 2:2
Lo Çelso, 68-p. Diao, 90+4 – Levandovski, 39. Torres, 82. (54749)
Barselona: Penya, Balde (Fort, 88), Martines, Kubarsi, Kunde, Olmo (De Yonq, 60), Kasado, Pedri (Qavi, 74), Rafinya (Torres, 60), Yamal, Levandovski (Viktor, 74).

Jirona – Real 0:3
Bellingem, 36. Gülər, 55. Mbappe, 62. (13827)
Real: Kurtua, Mendi (F.Qarsiya, 81), Rüdiger, Çuameni, Vaskes, Modriç, Valverde (Asensio, 81), Bellingem (Sebalyos, 61), Gülər (Yanyes, 89), Dias, Mbappe (Endrik, 81).

Atletiko – Sevilya 4:3
De Paul, 10. Qrizmann, 62; 90+4. Lino, 79 – Lukebaiko, 12. Romero, 32. Xuanlu, 57. (60065)
Atletiko: Oblak, Qalan, Lanqle (Vitsel, 79), Ximenes, M.Lyorente, Qallaher (Sörlot, 63), Barrios, De Paul (Koke, 63), Simeone (Lino, 75), Qrizmann, Alvares (Korrea, 75).

Leqanes - Real Sosyedad 0:3
Mendes, 14. Barreneçea, 78. Oyarsabal, 90+2. (11312)

Atletik Vilyarreal 2:0
Paredes, 15. İ.Uilyams, 69. (47203)

Selta – Malyorka 2:0
Alvares, 32. Aspas, 83. (22861)

Las Palmas – Valyadolid 2:1
Ramires, 21; 64 – Andre, 45. (21610)

Valensiya – Rayo Valyekano 0:1
Siss, 7. (40968)

Osasuna – Alaves 2:2
Budimir, 54. R.Qarsiya, 61 – K.Qarsiya, 1; 68. (18220)

Xetafe – Espanyol 1:0
Rodriges, 8. (7559)

1. Barselona 17 12 2 3 50-19 38
2. Real 16 11 3 2 34-13 36
3. Atletiko 16 10 5 1 30-11 35
4. Atletik 17 9 5 3 26-15 32
5. Vilyarreal 15 7 5 3 27-25 26
6. Real Sosyedad 16 7 3 6 16-11 24
7. Osasuna 16 6 6 4 22-25 24
8. Malyorka 17 7 3 7 16-20 24
9. Jirona 16 6 4 6 22-23 22
10. Selta 16 6 3 7 25-27 21
11. Betis 16 5 6 5 18-20 21
12. Sevilya 16 5 4 7 17-23 19
13. Rayo Valyekano 15 5 4 6 15-16 19
14. Las Palmas 16 5 3 8 22-27 18
15. Xetafe 16 3 7 6 11-13 16
16. Alaves 16 4 3 9 18-27 15
17. Leqanes 16 3 6 7 14-23 15
18. Espanyol 15 4 1 10 15-28 13
19. Valensiya 14 2 4 8 13-22 10
20. Valyadolid 16 2 3 11 11-34 9

Bombardirlər: Levandovski (Barselona) – 16, Rafinya (Barselona) - 11, Budimir (Osasuna) – 10, Mbappe (Real) – 9.

Turun rəqəmi
12 – “Atletiko” cari mövsümdə 90-cı dəqiqədə və daha gec vurduğu qolların sayını bu həddə çatdırdı. Simeonenin komandası son üç oyunda uzatma dəqiqələrində 4 dəfə fərqlənib.

Turun ulduzu
Antuan Qrizmann (Atletiko) – artıq bütün diqqətini klubuna yönəldən fransalı ulduz çətin anda “hindular”ın köməyinə çatdı. Dərhal fərqi minimuma endirməklə möhtəşəm geridönüşün əsasını qoydu, uzatma dəqiqələrində isə qələbə qolunu vurdu.

Turun sitatı
Dieqo Simeone, “Atletiko”nun baş məşqçisi: