La Liqada hesabat turu nəhənglərin – “Real”, “Barselona” və “Atletiko”nun qələbəsi ilə əlamətdar oldu. “Selta” da mövsümün əvvəlini inamlı keçirir. Viqo klubu ardıcıl 2-ci əzmkar qələbəsini qazandı.

“Real” “Valyadolid”i darmadağın etsə də, çətin ki, Ançelotti bu qələbədən razı qala. Onun komandası ilk yarıda rəqib qapısı önündə heç bir təhlükəli vəziyyət yaratmadı. Yalnız Mbappe bir dəfə qapıya zərbə vurmağa imkan tapdı. Fasilədən az sonra madridlilərin bəxti gətirdi. Valverde 25 metrdən cərimə zərbəsi yerinə yetirərkən top qapıçı Heynin üzərinə gedirdi. Ancaq “canlı sədd”də dayanan Yuriçdən səkərək tora düşdü.

“Real” təzyiqi artırsa da, daim nəsə çatmırdı. Gülərin zərbəsinin qarşısını Heyn aldı, Rodriqo ilə Vinisius bir-birinə mane oldu. Mbappe də La Liqada ilk qolunu vurmağa yaxın idi. Hadisələrin belə axarından narazı qalan Ançelotti hücum xəttini tam yenilədi. Məhz sonradan meydana çıxan oyunçular – Diasla Endrik son dəqiqələrdə fərqi darmadağın həddinə çatdırdı.
“Atletiko” da “Jirona” üzərində 3:0 hesablı qələbə qazandı, sadəcə, bu oyun məzmunca fərqli idi. İspaniyanı Çempionlar Liqasında təmsil edən komandalardan yalnız birinin bu yarışa hazır olduğu göründü. İlk yarının sonunda qonaqların qapıçısı Qassaniqa cərimə meydançasından kənarda əllə oynadı. Hakim ona yalnız sarı vərəqə göstərdi, 17 metrdən standart vəziyyəti yerinə yetirən Qrizmann isə hesabı açdı.

Kataloniyalılar dərhal intriqanı bərpa edə bilərdi, ancaq Ruis qapıçı meydançası daxilində Oblakla bacarmadı. Düşünmək olardı ki, 2-ci hissədə meydanda daha gərgin mübarizə gedəcək. Ancaq Qassaniqa intriqanın axırına çıxdı. O, Lyorentenin o qədər də çətin olmayan zərbəsinin qarşısını ala bilmədi. Dəyişikliklərdən sonra “Jirona” topa nəzarət etməyə başlasa da, Oblakın qapısı önündə təhlükəli vəziyyətlərin sayı yox dərəcəsində idi. Uzatma dəqiqələrində isə darmadağın reallaşdı. Lyorentenin ötürməsindən sonra Koke Qassaniqanı məyus etdi.

Xavinin sevimli hesabı 1:0 idi. Belə görünür ki, Flik 2:1-ə üstünlük verir. “Barselona” yenə bu hesabla qalib gəldi. Düzdü, bu dəfə kataloniyalılar hesabı açdı. İlk yarının ortalarına qədər meydanda heç bir maraqlı hadisə baş vermədi. Yamal 24-cü dəqiqədə hesabı açandan sonra oyun canlandı. İti bucaq altında olan Levandovski topu uzaq dirəyə vurdu, 42-ci dəqiqədə isə “Barsa”nın qapısına penalti təyin olundu. Sanset hesabı bərabərləşdirmək imkanını qaçırmadı. Fasilədən sonra Levandovski növbəti dəfə topu dirəyə vurdu. “Atletik”dən isə Uilyams qardaşları nəsə etməyə çalışırdı.

Hər halda, Levandovski “Barsa”nı əsəbi sonluqdan xilas etdi. Pedri topu qapıçı meydançasına qaldırdı, Padilyanın qaytardığı top polşalı ulduzun önünə düşdü, o isə belə imkanə əldən vermədi. Baskların hesabı bərabərləşdirmək üçün irəli atılmağa gücü qalmamışdı.

“Selta” yaxşı, “Valensiya” pis mənada təəccübləndirməkdədi. “Yarasalar” “Barselona” ilə oyunda olduğu kimi, yenə hesabı açdılar, ancaq ardından üç top buraxdılar. Cəmi 14 dəqiqə sonra hesab artıq 2:1 viqoluların xeyrinə idi. Hələ Mamardaşvili 45+5-ci dəqiqədə Aspasın penaltini qola çevirməsinə imkan vermədi. Bununla belə, Beltran 60-cı dəqiqədə “Selta”nın 3-cü qolunu vurdu. Qalan vaxt ərində “yarasalar” heç nə ilə yadda qalmadı.

“Vilyarreal” da bu mövsüm canlanıb. İlk turda evdə “Atletiko” ilə heç-heçə edən “sarılar” bu dəfə səfərdə “Sevilya”ya qalib gəldi. Onlar qələbə topunu 90+5-ci dəqiqədə vurdu.

Turun qalan oyunlarına gəlincə, “Leqanes” evdə “Las Palmas”dan üstün oldu – 2:1. “Xetafe” ilə “Rayo Valyekano”nun qarşılaşdığı Madrid derbisi çox sönük keçdi və bunun məntiqi nəticəsi kimi hesab açılmadı. “Alaves” – “Betis” oyunu da qolsuz bitdi. “Malyorka” səfərdə “Osasuna”ya uduzdu. Mövsümlərarası dövrdə Breytveytlə vidalaşan “Espanyol” da ardıcıl 2-ci oyunda qələbəyə həsrət qaldı. “Real Sosyedad”a qələbə qazandıran yeganə qolu sonradan meydana çıxan Kubo vurdu.

2-ci tur
Real – Valyadolid 3:0
Valverde, 50. Dias, 88. Endrik, 90+6. (70178)
Real: Kurtua, F.Qarsiya, Rüdiger, Militao, Karvaxal, Çuameni, Valverde, Vinisius (Sebalyos, 85), Gülər (Dias, 69), Rodriqo (Sebalyos, 69), Mbappe (Endrik, 86).
Barselona – Atletik 2:1
Yamal, 24. Levandovski, 75 – Sanset, 42-p. (46448)
Barselona: Ter Ştegen, Balde (Martin, 90), Martines, Kubarsi, Kunde, Pedri, Bernal (E.Qarsiya, 83), Torres (Lopes, 63), Rafinya, Yamal (Viktor, 90), Levandovski.
Atletiko – Jirona 3:0
Qrizmann, 39. Lyorente, 48. Koke, 90+4. (60414)
Atletiko: Oblak, Le Norman, Ximenes, Aspilikueta, Barrios, De Paul (Koke, 59), Rikelme (Qallaher, 58), Lyorente, Lino (Mandava, 68), Qrizmann (Korrea, 81), Alvares (Sörlot, 81).
Jirona: Qassaniqa, Qutyerres, Blind, Dav.Lopes, Martines, Martin (Portu, 59), Romeo (Solis, 59), Errera, Xil, Sıqankov (Almena, 68), Ruis (Miyovski, 59).
Selta – Valensiya 3:1
Minqesa, 23. Aspas, 28. Beltran, 60 – D.Lopes, 14. (23519)
Sevilya – Vilyarreal 1:2
Lukebakio, 45+6 – Qruneveld, 2. Peres, 90+5. (34004)
Osasuna – Malyorka 1:0
Rub.Qarsiya, 55. (19900)
Xetafe – Rayo Valyekano 0:0
(9529)
Espanyol – Real Sosyedad 0:1
Kubo, 80. (20900)
Leqanes – Las Palmas 2:1
Krus, 71. Frankesa, 85 – Ramires, 90+3. (10052)
Alaves – Betis 0:0
(16623)

1. Selta 2 2 0 0 5-2 6
2. Barselona 2 2 0 0 4-2 6
3. Atletiko 2 1 1 0 5-2 4
4. Real 2 1 1 0 4-1 4
5. Vilyarreal 2 1 1 0 4-3 4
6. Leqanes 2 1 1 0 3-2 4
7. Rayo Valyekano 2 1 1 0 2-1 4
8. Osasuna 2 1 1 0 2-1 4
9. Real Sosyedad 2 1 0 1 2-2 3
10. Valyadolid 2 1 0 1 1-3 3
11. Xetafe 2 0 2 0 1-1 2
12. Betis 2 0 2 0 1-1 2
13. Sevilya 2 0 1 1 3-4 1
14. Las Palmas 2 0 1 1 3-4 1
15. Atletik 2 0 1 1 2-3 1
16. Alaves 2 0 1 1 1-2 1
17. Malyorka 2 0 1 1 1-2 1
18. Jirona 2 0 1 1 1-4 1
19. Espanyol 2 0 0 2 0-2 0
20. Valensiya 2 0 0 2 2-5 0

Bombardir: Levandovski (Barselona) – 3.
Növbəti turun oyunları: Vilyarreal – Selta, Malyorka – Sevilya, Rayo Valyekano – Barselona, Atletik – Valensiya, Valyadolid – Leqanes, Real Sosyedad – Alaves, Atletiko – Espanyol, Jirona – Osasuna, Las Palmas – Real, Betis – Xetafe.

Turun rəqəmi
1 – Endrik “Real”ın 21-ci əsrdə La Liqada debüt oyununda qol vuran ən gənc (18 yaş 35 gün) oyunçusudu. Həmçinin bu zaman kəsiyində çempionatdakı ilk oyununda fərqlənən 5-ci ən gənc oyunçudu.

Turun ulduzu
Oskar Minqesa (Selta) – “Barselona”nın yetirməsi “yarasalar”la oyunda həm qol vurdu, həm də məhsuldar ötürmə verdi. “Selta”nın ardıcıl 2-ci əzmkar qələbəsinin memarı oldu.

Turun sitatı
Karlo Ançelotti, “Real”ın baş məşqçisi: “Mbappenin üç fərqlənmək imkanı oldu. Düşünürəm ki, burda da qolları sıralamağa başlayacaq. Solda və ya sağda oynamasının fərqi yoxdu”.

Reaksiya
Hans-Diter Flik, “Barselona”nın baş məşqçisi:

Faktlar
* “Xetafe” – “Rayo Valyekano” oyununda komandalardan heç biri qapıya zərbə vurmadı. Bu isə 2003/04 mövsümündən bəri La Liqada ilk belə matçdı.
* “Selta” Klaudio Xiraldesin rəhbərliyi altında evdə keçirdiyi ilk 7 çempionat oyununun heç birində uduzmayıb (5 qələbə, 2 heç-heçə). Qalisiyalıların sabiq baş məşqçisi Viktor Fernandes də 1998-ci ildə belə nəticəyə nail olmuşdu (4 qələbə, 3 heç-heçə).