La Liqada çempionluq intriqası bərpa olundu. Buna son üç oyunda yalnız 1 xal qazanan “Barselona” şərait yaratdı. Artıq “Real” ilə yanaşı, “Atletiko” da zirvəyə iddiasını gizlətmir. Təbii ki, hesabat turunun maraqlı məqamları təkcə Kataloniya nəhənginin gözlənilməz məğlubiyyətindən ibarət deyil.

Evdə “Las-Palmas”a uduzan “Barselona” ardıcıl 3-cü oyunda xal itirdi. Kataloniyalılar 2021-ci ildən bəri belə aqibət yaşamırdı. Özü də klubun 125 yaşını qeyd edəndən cəmi bir gün sonra belə acı məğlubiyyətlə üzləşməsi heç yerinə düşmədi. Kataloniyalıları uzun illər ərzində münasibətlərinin yaxşı olmadığı “Las Palmas”ın məğlub etməsi də bir başqa dərddi. “Las Palmas” “Barsa”nı 1986-cı, səfərdə isə 1972-ci ildən bəri məğlub edə bilmirdi. Və budu, tarix yenidən yazılır. Oyun futbol estetikası baxımından heç də effektli alınmadı. Qarışıqlıq, mübarizə, top itkiləri, pauzalar... “Barsa” heç cür öz oyun üslubunu yeridə bilmədi, “Las Palmas” isə həm də bəxtin sayəsində fədakarcasında müdafiə olundu, əks-hücumlarda şans axtardı. Belə əks-hücumların sayı o qədər çox olmasa da, Ramireslə Fabio Silvanın fərqlənməsi üçün kifayət etdi. “Barselona”nın heyətində Rafinya fərqləndi.

Kataloniyalılar daha bir neçə qol imkanını əldən verdi. Onlar indi heç də ən yaxşı dönəmini yaşamır. Böhranın nə qədər davam edəcəyi də bilinmir.
Təbii ki, “Real” “Barsa”nın hədiyyəsindən yararlanmaya bilməzdi. 16 ildən artıqdı evdə “Xetafe”yə uduzmayan Madrid nəhəngi bu dəfə də ənənəni pozmadı. Bəlkə də meydan sahibləri müəyyən çətinlik çəkəcəkdi. Ancaq ilk yarının ortalarında Rüdigeri yerə sərən Nyom penaltiyə səbəbkar oldu. Ardından “Xetafe”nin daha bir oyunçusu – İqlesias da kobud səhvə yol verdi. Mbappe qonaqları 2-ci dəfə cəzalandırdı. Fasilədən sonra oyun bərabərləşdi. “Real”dan Mbappe bir-birinin ardınca imkanları qaçırdısa, “mavilər”in, sadəcə, bəxti gətirmədi. Uçe ilə Patrikin zərbələrindən sonra qapı çatı Kurtuanın köməyinə çatdı. Əlbəttə, “Real” da dəfələrlə 3-cü qolu vurmağa yaxın oldu. Ancaq Mbappedə hər dəfə nəsə çatmadı, digər oyunçuların zərbələrinin öhdəsindən isə Soriya gəldi. “Xetafe”nin qapıçısını bu məğlubiyyətə görə qətiyyən qınamaq olmaz. Bordalasın yetirmələri hücumda bir qədər də inadkar olsaydılar, qollar vuracaqdılar. Nəticə isə budu ki, növbəti qələbəsini qazanan “Real” itirilməyən xallara görə artıq “Barsa”dan irəlidədi.

Madridin digər nəhəngi də inamlı qələbə qazandı. “Atletiko” səfərdə “Valyadolid”i darmadağın etdi. Bu, “hindular”ın bütün turnirlər çərçivəsində ardıcıl 7-ci qələbəsidi. Hesabı 26-cı dəqiqədə “Atletiko”da ilk qolunu vuran Lanqle açdı. Maraqlıdı ki, fransalı La Liqada sonuncu dəfə də elə bu stadionda 4 il əvvəl – “Barselona”nın oyunçusu kimi fərqlənmişdi. 11 dəqiqə sonra hesab artıq 0:3 oldu. Qrizmann 52-ci dəqiqədə 4-cü qolu vurandan sonra meydan sahibləri bir qədər fəallaşdı. Hətta Sançesin uzaqdan zərbəsi tirdən döndü. Ancaq oyunda son nöqtəni də “hindular”, daha dəqiqi, Sörlot qoydu. Paulo Petsolanonun çalışdırdığı “Valyadolid” 2010-cu ilin aprelindən bəri ilk dəfə 7 ev oyununda qələbə qazana bilməyib. Düzdü, bu məğlubiyyət uruqvaylı mütəxəssisə baha başa gəldi – oyundan dərhal sonra qovuldu. Pessolano “Valyadolid”i ötən ilin aprelindən çalışdırırdı. Komanda məhz onun rəhbərliyi altında elitaya qayıtmışdı.

“Real Sosyedad” evdə “Betis”i məğlub etməyi bacardı. Hər iki komanda avrokubok oyunlarının yorğunluğu fonunda çox solğun təsir bağışladı. “Real Sosyedad”ın sabiq müdafiəçisi Dieqo Lyorente 14-cü dəqiqədə qapıların yerini salmaqla bir növ keçmiş komandasına yardım göstərdi. 15 dəqiqə sonra isə qonaqlar penalti ilə cəzalandırıldı. “Zərərçəkən” Oyarsabal penaltini qola çevirməklə oyunun taleyini həll etdi.

Turun qalan oyunlarına gəlincə, “Espanyol” 4 oyunluq məğlubiyyət seriyasını “Selta” ilə qarşılaşmada qırdı. Avrokuboklara vəsiqə uğrunda mübarizə aparan “Vilyarreal” evdə “Jirona” ilə heç-heçə etdi. Kataloniyalıları məğlubiyyətdən 7-ci uzatma dəqiqəsində Kreyçi qurtardı. “Sarılar” bütün turnirlər çərçivəsində keçirdiyi son 6 oyunda uduzmayıb. “Atletik” səfərdə “Rayo Valyekano”ya, “Malyorka” isə evdə “Valensiya”ya qalib gəldi. “Alaves” – “Leqanes” oyunu məhsuldar heç-heçə ilə bitdi. Turun dünən axşam keçirilən son oyununda “Sevilya” “Osasuna”ya qalib gələ bilmədi – 1:1.

15-ci tur
Barselona – Las Palmas 1:2
Rafinya, 61 – Ramires, 49. F.Silva, 67. (43921)
Barselona: Penya, Balde (Martin, 26), Martines, Kubarsi (Viktor, 90+2), Kunde (Fort, 46), Pedri, Qavi (De Yonq, 57), Lopes (Torres, 57), Torre (Yamal, 46), Rafinya, Levandovski.
Real – Xetafe 2:0
Bellingem, 30-p. Mbappe, 38. (74341)
Real: Kurtua, F.Qarsiya, Rüdiger, Asensio, Vaskes, Bellingem (Gülər, 46), Sebalyos, Valverde, Dias, Rodriqo (Modriç, 67), Mbappe.
Valyadolid – Atletiko 0:5
Lanqle, 26. Alvares, 35. De Paul, 37. Qrizmann, 52. Sörlot, 90+2. (23482)
Atletiko: Oblak, Qalan (Mandava, 46), Lanqle, Ximenes, M.Lyorente, Qallaher, Barrios (Lino, 79), De Paul (Koke, 64), Simeone, Alvares (Korrea, 64), Qrizmann (Sörlot, 64).
Real Sosyedad – Betis 2:0
D.Lyorente, 14-öz qapısına. Oyarsabal, 31-p. (28119)
Espanyol – Selta 3:1
Kardona, 40. Kabrera, 53. Şeddira, 87 – Aspas, 82-p. (43291)
Vilyarreal – Jirona 2:2
Barri, 23. Baena, 46 – Van de Beek, 66. Kreyçi, 90+7. (17732)
Rayo Valyekano – Atletik 1:2
Nteka, 14 – Sanset, 65; 78. (17732)
Malyorka – Valensiya 2:1
Larin, 45+3. Prats, 81 – Rioxa, 32-p. (17717)
Alaves – Leqanes 1:1
Visente, 87 – Rodriges, 67. (16881)
Sevilya – Osasuna 1:1
Lukebakio, 72 – Budimir, 69. (31536)

1. Barselona 15 11 1 3 43-16 34
2. Real 14 10 3 1 30-11 33
3. Atletiko 15 9 5 1 26-8 32
4. Atletik 15 7 5 3 22-14 26
5. Vilyarreal 14 7 5 2 27-23 26
6. Malyorka 15 7 3 5 15-13 24
7. Osasuna 15 6 5 4 20-23 23
8. Jirona 15 6 4 5 22-20 22
9. Real Sosyedad 15 6 3 6 13-11 21
10. Betis 15 5 5 5 16-18 20
11. Sevilya 15 5 4 6 14-19 19
12. Selta 15 5 3 7 23-27 18
13. Rayo Valyekano 14 4 4 6 14-16 16
14. Leqanes 15 3 6 6 14-20 15
15. Las Palmas 15 4 3 8 20-26 15
16. Alaves 15 4 2 9 16-25 14
17. Xetafe 15 2 7 6 10-13 13
18. Espanyol 14 4 1 9 15-27 13
19. Valensiya 13 2 4 7 13-21 10
20. Valyadolid 15 2 3 10 10-32 9

Bombardirlər: Levandovski (Barselona) – 15, Rafinya (Barselona), Budimir (Osasuna) - 9.
Növbəti turun oyunları dekabrın 6-9-u aralığında keçiriləcək: Selta – Malyorka, Las Palmas – Valyadolid, Betis – Barselona, Valensiya – Rayo Valyekano, Jirona – Real, Leqanes – Real Sosyedad, Atletik – Vilyarreal, Osasuna – Alaves, Atletiko – Sevilya, Xetafe – Espanyol.

Turun rəqəmi
6 – cari mövsümdə “Real”la oyunlarda rəqiblərinin qapısına bu qədər penalti təyin olunub. Bellingem madridlilərin 6-cı penaltisini də qola çevirdi. Heç bir başqa komanda “Real”dan çox penalti qazanmayıb. O da maraqlıdı ki, indiyə qədər Ançelottinin komandası bir dəfə də belə cəzalanmyıb.

Turun ulduzu
Yasper Sillessen (Las Palmas) – niderlandlı qapıçı komandasının qələbəsi üçün əlindən gələni etdi. Dəfələrlə xilaskar oldu, çətin vəziyyətlərlə ustalğını göstərdi. Xüsusən də hava toplarına çıxışda çox inamlı təsir bağışladı. “Las Palmas” qələbəyə görə həm də ona minnətdar olmalıdı.

Turun sitatı
Dieqo Simeone, “Atletiko”nun baş məşqçisi:

Faktlar
* “Barselona” “Las Palmas”la oyunda La Liqada 14-cü dəfə topu qapı çatına vurmaqla bu özünəməxsus reytinqdə liderliyi möhkəmlətdi. Avropanın aparıcı liqalarında çıxış edən komandalardan “Bayer-04”, “Lill” və “Kalyari” bu göstəricidə kataloniyalılara daha yaxındı. Cari mövsümdə onların hər birinin 10 zərbəsi qapı dirəyindən və ya tirindən dönüb.
* “Barsa” 1986-cı ilin fevralından bəri ilk dəfə çempionatda “Las Palmas”a uduzdu. Həmin vaxt kataloniyalılar səfərdə darmadağın olmuşdu (0:3). Ardından keçirilən 17 oyundan 12-si “Barsa”nın qələbəsi ilə, 5-i isə heç-heçə bitmişdi.

Oyundan sonra
Hans-Diter Flik, “Barselona”nın baş məşqçisi:

Karlo Ançelotti, “Real”ın baş məşqçisi: