“Oyuna bir başqa həvəslə baxdıq. Komandamız Avropa Liqasında ilin son oyununa çıxdı. Ulu öndərimiz Heydər Əliyevin anım günü idi, fikirləşdik ki, oyun yaxşı alınacaq. Ümumən oyunun ab-havası, atmosferi, azərbaycanlı azarkeşlərin dəstəyi qürurverici idi. Artıq İsveç kimi ölkələr də bizi zəif qəbul eləmir. Onların final firtindən sonrakı sevincini yəqin gördüz. Elə bil dünya və yaxud Avropa çempionu olublar. Bu o deməkdi ki, Avropa ölkələri “Qarabağ”ın timsalında bizi də futbol ölkəsi kimi qəbul etməyə başlayıblar. Buna uyğun olaraq, UEFA da bu oyuna gözaltı baxmamışdı. Portuqaliya kimi futbol ölkəsindən hakimlər təyin etmişdilər. Hakimlik barədə mənfi fikirlər yürütmək düzgün olmaz. Çünki oyunun axarı, köməkçilərlə əlaqəsi, meydanda davranışı, futbolçularla diskussiyası, verdiyi vərəqələr, texniki zona ilə təmasa girməsi, bir sözlə, bütün hərəkətlərində hakimliyə xas bütün keyfiyyətləri gördük. Ümumən əvvəldən sürətli, texnikalı oyunu pozmayacağı, həmçinin kobudluğa icazə verməyəcəyi bəlli idi. Sona qədər hiss olundu ki, oyunun axarını sındırmaq istəmir. Fitdən çox da istifadə etmədi. Təəssüf, bunun qarşılığında komandamızda yaxşı nəticə görmədik. Hakimlikdə ciddi nöqsanlar olmadı. Çıxardığı qərarlarda çox qətiyyətli idi. Cərimə meydançası daxilində elə bir qaranlıq məqam olmadı ki, VAR-a müraciət etsin.Yəqin bu oyuna görə yaxşı qiymət alar. Bunun əsasında gələn il daha ağır oyunlara təyinat alar. Yenə də Qurban Qurbanovun mətbuat konfransında dediyi kimi: futbolda silinməyən qanunlar var. Bu gün böyük komandalar da eniş yaşayır. Amma “Qarabağ”dan daha çox şey tələb edirik. Necə ki, “Mançester Siti”nin də məğlubiyyət yaşadığını görürük. Hər bir halda təmsilçimizə bu turnirdə uğurlar arzulayıram”.