“Dərin təəssüf hissi keçirirəm. Ancaq bir azərbaycanlı kimi qürurlandım. Ki, doğrudan da futbol aləmində, camiəsində, dünyasında, nəhayət, bizi də bir futbol ölkəsi kimi tanımağa başladılar. Bu həm də “Bayer-04” – “Qarabağ” oyununa hakim təyinatında özünü göstərdi. Doğrusu, finala az qalmış edilən hakim təyinatlarında UEFA diqqətli olmağa çalışır. Həmçinin sözügedən oyunun təyinatı da bura daxildi. Doğrusu, hakimin “böyük beşlik” ölkələrdən təyin olunacağını gözləyirdim. Baxmayaraq ki, Almaniya klubu futbolu elə də inkişaf etməyən bir ölkənin komandasına qarşı oynayırdı. Hakimlərin İtaliya və ya İngiltərədən olacağını təxmin etmişdim. Yəqin UEFA Hakimlər Komitəsi bu matçın ağırlığını nəzərə alaraq İngiltərənin seçilən hakimlərindən olan Entoni Teyloru bu görüşə təyin edib. Doğrudan da, UEFA artıq bizi bir futbol ölkəsi kimi tanımağa və hörmət etməyə başlayıb. Düzü, Teylorun idarə etdiyi çempionat və avrokubok oyunlarını izləmişəm. Sabit hakimlik edən, oyunu “oxumağı” bacaran biridi. Ümumiyyətlə, peşəkar hakimə xas olan bütün xüsusiyyətlər Teylorda cəmləşib. Bir daha bu görüşdə də imicinə, ölkəsinə uyğun hakimlik etdi. Teylor müasir futbol oynamağa imkan verir. Doğrudu, VAR sistemindən də istifadə etdi. Əfsuslar olsun ki, bizim komandanın əleyhinə olan hər hansı bir qayda pozuntularına görə oyunu qaydalar çərçivəsində davam etdirdi. Elvin Cəfərquliyevin qırmızı vərəqəsinə gəlincə, əvvəlcə onun ilk qayda pozuntusu olduğunu dəyərləndirərək, sarı vərəqəylə cəzalandırdı. Qapı istiqamətinə həmin hərəkət cinahdan olsaydı, bəlkə də başqa cür dəyərləndirmək olardı. Lakin Elvin öncə topla düzgün rəftar edə bilmədi və itirəndən sonra rəqibə qarşı həmin hərəkəti etdi. Bu da futbolçunu aşkar qol imkanından məhrum etmək deməkdi. Ceremi Frimponq isə çox sürətliydi. Bəlkə də düşünən olacaq ki, həmin oyunçu 3-5 addım atandan sonra yıxıldı. Ola bilsin, bu Frimponqun istedadıdı. Amma çox sürətli oyunçularda belə hallar baş verir. Cüzi toxunuş onların müvazinətini itirməsinə kifayət edir. Doğrudu, Elvin onu saxlamasaydı, qapıçıyla təkbətək qalacaqdı. Amma bütün təkbətəklər də qolla nəticələnmir. Necə ki, biz bunu ötən oyunda Juninyonun ifasında gördük. Məncə, Elvin o hərəkəti etməməliydi. 32-ci dəqiqədə Olaviyo Juninyo ilə bağlı bir epizod oldu. Orda birmənalı, qəti şəkildə çiyin-çiyinə mübarizə olduğu göstərildi. Amma həmin məqamda da VAR-a baxmaq, ondan sonra ortaq məxrəcə gəlib qərar qəbul etmək olardı. Həmin epizodda topa ilk toxunuş Juninyodan oldu. Futbolçumuz daha sonra topu hərəkət istiqamətinə atır və təkbətək çıxmaq şansı qazanan vaxt rəqib çiyin zərbəsiylə buna mane olur. Bu ikili standartlar həmişə bizim və inkişaf etməyən ölkələrin komandalarının top səviyyəli klublarla görüşündə özünü göstərir. Çox istərdim ki, 32-ci dəqiqədə VAR-a baxaydılar və müzakirə edəydilər. Amma Elvinin hərəkətində dərhal hakim VAR-a çağrıldı. Ümumən qarşılaşmada hakim idarəçiliyi pis deyildi. Baş hakim matçı nəzarətdə saxlamağı bacardı. Çox təəssüf ki, 10 nəfərlə mübarizə aparmasına baxmayaraq, iki top öndə olan komandamız üçün son 20 dəqiqə hədsiz ağır oldu. Rəqibin təzyiqi çox güclü idi. Yəqin qismət belə imiş. Amma “Qarabağ”a bir daha gələcək oyunlarda uğurlar arzulayaq. Futbolçulara da təşəkkürümüzü bildirək ki, həmin gecə fanatlara yatmaq şansı yaratmadı. Ümumən hakim idarəçiliyi barəsində daha çox danışmaq istəmirəm. Lakin Elvinin qırmızı vərəqə alması tam qaydalar çərçivəsində oldu”.