"Avropa çempionatının bütün oyunlarına baxa bilməsəm də, bacardığım qədər izləməyə çalışıram. Oyunların gedişində hiss olunur ki, hakimlər çox ciddi təlimatlandırılıb, hazırlıq prosesi yüksək səviyyədə keçirilib. Yəqin ki, hakimlər AÇ-nin başlamasına bir neçə həftə qalmış son təlimatlarla təlim-məşq toplanışında tanış olublar. Baxdığım oyunlarda ciddi səhv görməmişəm. Hazırlıq prosesinin çox yüksək səviyyədə keçdiyi hiss olunur. Hakimlər oyunlara məsuliyyətlə yanaşırlar. Ola bilər ki, ilk tur olduğu üçün UEFA tanınmış, böyük nüfuza malik hakimləri açılış matçlarına təyin etdi. Bu da meydanda öz təsirini göstərir. Komandaların, azarkeşlərin hakimlərə münasibətindən hakimlərin meydandakı nüfuzunu hiss etmək olur. Bu da əsas xüsusiyyətlərdəndi. Normalda açılış turları bir qədər həyəcanlı olsa da, təcrübəli hakimlər sayəsində bu hiss olunmadı. Hakimlər komandası həm rabitə vasitəsilə, həm də vizual olaraq baş hakimi idarə edir. Turnir yüksək səviyyədə təşkil olunub. Qardaş və qonşu ölkələr Türkiyə və Gürcüstanın oyunu olacaq. Hər iki komandaya uğurlar arzulayıram. Lakin ürəyimiz Türkiyə ilə döyündüyü üçün onlara azarkeşlik edəcəyəm. Almaniya futbol ölkəsi olduğuna görə yarış yüksək səviyyədə təşkil olunub. Rumınya - Ukrayna oyununda təhlükəsizlik qaydalarında kiçik səhv oldu və azarkeş stadiona daxil oldu. Heç xoş hal olmasa da, azarkeşlərin futbol sevgisi onları bu hərəkətlərə vadar edir. Lakin Almaniya kimi inkişaf etmiş ölkədə təhlükəsizlik qaydaları yüksək səviyyədə olmalıdı. Oyunöncəsi azarkeşlər arasında müəyyən narazılıqlar olsa da, bu təbii haldı, futbolun bir hissəsidi. Yəqin ki, sona qədər belə də davam edəcək. Bir daha başda qardaş Türkiyə olmaqla bütün komandalara uğurlar arzulayıram".