Messi MLS-də hamını qabaqladı
MLS-də mövsümün ən dəyərli oyunçusu müəyyənləşib. Bu nominasiyanın qalibi Lionel Messi olub.
ABŞ-nin yüksək liqasının mətbuat xidmətinin məlumatına görə, “İnter Mayami”nin argentinalı hücumçusu 38,43 faiz səs toplayaraq fərdi mükafata sahib olub. 2-ci yeri 33,7 faiz səslə “Kolambus Kryu”nun oyunçusu Kuço Ernandes tutub. Qeyd edək ki, mövsümün ən dəyərli oyunçusu futbolçular, klubların texniki heyəti və media nümayəndələrinin iştirakıyla keçirilən səsvermə nəticəsində seçilir.
Sona çatmaqda olan mövsümdə “İnter Mayami”nin heyətində 22 oyuna çıxaraq 21 qol vuran və 11 məhsuldar ötürmə verən Messi “Barselona”nın azarkeşlərinə müraciət edib. 37 yaşlı futbolçu onlar üçün darıxdığını deyib:
“Barselona”nın azarkeşlərinə mesajım budu ki, mən sizin üçün çox darıxıram və ümid edirəm ki, tezliklə sizi yenidən görəcəyəm. Siz dünyanın ən yaxşı klubunun bir hissəsi olmaqdan qürur duymalısınız”.
Xatırladaq ki, Messinin klub karyerası “Barselona”da başlayıb: O, 2004-21-ci illərdə bu klubun formasında 10 dəfə La Liqanın, 8 dəfə İspaniya Superkubokunun, 4 dəfə Çempionlar Liqasının və 3 dəfə Klublararası Dünya Çempionatının qalibi olub. Lionel İspaniya çempionatının, “Barselona”nın, “İnter Mayami”nin və Argentina yığmasının ən yaxşı bombardiridi.
