ABŞ çempionatının yüksək liqasında mövsüm hələ sona çatmayıb. Buna baxmayaraq, artıq MLS-də mövsümün ən yaxşıları müəyyənləşib.

"Football-plus.az" xəbər verir ki, dekabrın 10-da “Kolambus Kryu” və “Los Anceles” arasında keçiriləcək finalda çempion məlum olacaq. Amma həlledici matçın nəticəsi laureatların siyahısına təsir etməyəcək. Ona görə ki, müxtəlif nominasiyalar üzrə qaliblər artıq seçilib.

Lusiano Akosta MLS-in ən dəyərli oyunçusu seçilib. “Sinsinnati”nin 28 yaşlı argentinalı yarımmüdafiəçisi liqa rəhbərliyinin təşkil etdiyi sorğuda 60,37 faiz səslə birinci olub. Sonrakı yerləri Denis Buanqa (Los Anceles, 14,97 faiz) və Tyaqo Almada (Atlanta Yunayted, 6,46 faiz) tutublar. Mövsümün ən yaxşı gənc oyunçusu adını Almada qazanıb. “Sent Luis Siti”nin oyunçusu Roman Bürki MLS-in ən yaxşı qapıçısı seçilib. 32 yaşlı isveçrəli səsvermədə 67,48 faiz səs toplayıb. “Sinsinnati”də çıxış edən Mett Miazqa mövsümün ən yaxşı müdafiəçisi üçün nəzərdə tutulan mükafata sahib çıxıb. 28 yaşlı amerikalının oyundaşı Akosta daha bir nominasiyanın qalibi olub. O, mövsümün ən baxımlı qolunun müəllifi olub. Lusianonun sentyabrın 24-də keçirilən “Şarlott” ilə oyunda (3:0) vurduğu qol MLS-in rəsmi saytında azarkeşlər arasında təşkil edilən sorğuda daha çox səs toplayıb.

MLS-də mövsümün rəmzi komandası da müəyyənləşib. Qeyd edək ki, “İnter Mayami”yə yayda qoşulan Lionel Messi ən yaxşı “11-liy”ə düşə bilməyib. Onun komandası mükafatlar uğrunda pley-offa vəsiqə qazana bilməmişdi. Rəmzi komandanın heyəti isə belə olub: qapıçı - Roman Bürki (Sent Luis Siti); müdafiəçilər - Mett Miazqa (Sinsinnati), Tim Parker (Sent Luis Siti), Uoker Zimmerman (Neşvill); yarımmüdafiəçilər – Lusiano Akosta (Sinsinnati), Tyaqo Almada (Atlanta Yunayted), Ektor Errera (Hyuston Dinamo), Hani Muxtar (Neşvill), Denis Buanqa (Los Anceles); hücumçular - Georgios Yakumakis (Atlanta Yunayted), Kuço Ernandes (Kolumbus Kryu).