Mövsümə yaxşı başlayan, amma son 3 turda 8 xal itirməklə liderdən 10 xal geri düşən “Beşiktaş”da qış dönəmində dəyişikliklər yaşanacaq.

Baş məşqçi Covanni van Bronkhorstun komandadan ayrılmalı olan futbolçuların siyahısını müəyyənləşdirib. Söhbət ilk növbədə çox az oynayan və ya ümumiyyətlə, oynamayan futbolçulardan gedir. Jan Onana, Aleks Oksleyd-Çemberleyn, Baxtiyor Zaynutdinov, Can Keleş və Tayyp Talha Sanuç məhz belə oyunçulardandı. Bu siyahıya Artur Masuakunun da adını salmaq olar. Düzdü, Masuaku başqaları ilə müqayisədə daha çox oynayır. Amma onun ümidləri doğrultduğunu söyləmək çətindi. Qalanlarından fərqli Masuakunun müqavilə müddəti mövsümün sonunda başa çatacaq. Ona görə də onunla qışda vidalaşmaq asan olacaq. Ötən mövsümün ikinci dövrəsində “Marsel”ə icarəyə verilən Onana yenə başqa bir kluba icarəyə göndəriləcək. 24 yaşlı kamerunlu futbolçu Van Bronkhorstun planlarına daxil deyil.

Bu mövsüm heç bir rəsmi oyuna çıxmayan Oksleyd-Çemberleynə futbola başladığı klub olan “Sauthempton” ilə “Şeffild Yunayted” maraq göstərir. Transfer dəyəri 3 milyon avro civarinda olan təcrübəli ingiltərəli futbolçunun müqavilə müddəti 2026-ya qədərdi. Ona görə də “Beşiktaş” onun satışından müəyyən məbləğ qazanmaq istəyir. Zaynutdinova “Dinamo” və “Lokomotiv”dən təkliflər var. İstanbul nəhəngi onu da havayı buraxmaq niyyətində deyil. Can Keleşin də Van Bronkhorstun planlarına daxil olmaması diqqəti çəkir. Çünki bu futbolçu kluba bu yay gəlib və yeni transferlərdən biridi. Amma həm o, həm də 2022-dən bəri klubda olan Tayyip Talha Sanuç bu mövsüm cəmi 3 rəsmi oyunda forma geyib. Onların da qışda icarəyə verilməsi sürpriz olmayacaq. Bu arada məhsuldarlığı ilə diqqəti çəkən və karyerasının ən yaxşı mövsümünü keçirən Jedson Fernandeş də “Beşiktaş”ı tərk edə bilər. Belə ki, portuqaliyalı ulduza Nuri Şahinin çalışdırdığı Dortmund “Borussiya”sı ciddi maraq göstərir. Amma “Beşiktaş” bu futbolçunu əldən vermək istəmir.

Birincisi, Fernandeş Van Bronkhorstun sistemində çox mühüm rol oynayır və komandaya böyük fayda verir. İkincisi, “Benfika” ilə olan anlaşmaya əsasən bu yarımmüdafiəçinin satışından əldə olunacaq məbləğin 50 faizi lissabonlulara çatmalıdı. Ona görə də “ağ-qaralar” Fernandeşlə vidalaşmaqda maraqlı deyil. 25 yaşlı futbolçunun transfer dəyəri 17 milyon avrodu.