İspaniya La Liqasında 25-ci turun oyunları keçirilib.

Football-plus.az baş tutan qarşılaşmalardan sonra qeydə alınan maraqlı faktları diqqətinizə çatdırır:

Faktlar
* “Atletiko” son 12 oyunun yalnız birində “Real”a qalib gəlib. 2018-ci il sentyabrın 29-dan bəri “ağ şimşəklər” 7 oyunda qalib gəlib, 4 dəfə heç-heçə edib. Yeganə məğlubiyyət ötən il mayın 5-də qeydə alınıb.
* Alvaro Rodriges əsrin əvvəlindən bəri çempionatdakı Madrid derbilərindən vurulan ən “gənc” qolun müəllifidi. O, 18 yaş 226 günlüyündə fərqlənməklə İquaynın 2007-dəki göstəricisini (19 yaş 76 gün) yenilədi. Yalnız Raul “Atletiko”nun qapısına daha gənc yaşda – 17 yaş 131 günlüyündə (1994) yol tapıb.
* “Barselona” oktyabrdan bəri ilk dəfə çempionatdan uduzdu. Sonuncu dəfə ötən il oktyabrın 16-da “Real”a uduzan (1:3) kataloniyalılar həmin vaxtdan bəri keçirdiyi 13 oyunun 12-də qələbə qazanmış, 1-də heç-heçə etmişdi. Komanda həmçinin son 20 oyunda ilk dəfə qol vura bilmədi. Xavinin yetirmələri bütün turnirlərdə ardıcıl 19 oyunda fərqlənmişdi. Onlar buna qədər sonuncu dəfə ÇL-in “Bavariya” ilə oyunundan (26 oktyabr, 0:3) qolsuz ayrılmışdılar.

* “Almeriya” tarixində ilk dəfə “Barselona”nı məğlub etdi. Əndəlüslər buna qədər kataloniyalılarla çempionatda və kubokda 17 dəfə qarşılaşmışdı. “Barsa”nın 14 qələbəsi fonunda 3 dəfə də heç-heçə qeydə alınmışdı.