"Sumqayıt" Misli pemyer-liqasının ilk turunda doğma meydanda "Kəpəz"i məğlub edib - 0:2.

"Football-plus.az" xəbər verir ki, "kimyaçılar"ın baş məşqçisi Samir Abasov oyundan sonra keçirilən mətbuat konfransında jurnalistlərin suallarını cavablandırıb:

- Çox ağır vəziyyətdə oyuna çıxmışdıq. Psixoloji durumumuz yaxşı deyildi. "Fehervar"la matçın məyusluğu hələ keçməmişdi. 13 saat yolda olduq. Hazırlıq üçün bir gün vaxtımız var idi. Uşaqlar çox güc qoydular, enerji itirdilər. Futbolçulara təşəkkür edirəm.

- Tempinə aşağı olması yorğunluqla bağlıdı?
- Çempionatın oyunlarına baxanda görürsən ki, temp belədi. Hava şəraiti də öz sözünü deyir. Bu gün bürkü idi. Amma ilk oyun olduğuna görə belə hallar çox baş verir. İki komandada da dinamika düşmüşdü. Bu gün çox yorğun idik.

- Bu yeniyetmələrlə hara qədər gedəcəksiniz?
- Gənc, yeniyetmə olsun, fərqi nədi? Onlar hamısı komandamızın üzvüdü. Onlar da özlərini göstərməlidi.

- Əlinizdə olan heyətlə hədəf premyer-liqada qalmaq olacaq?
- İndi hədəf haqda danışmayacam. Əlimdə 13-14 futbolçu var. Onlarla da ən yaxşısını etməyə çalışacam. Hər oyuna qələbə üçün köklənəcəyik.

- Klub prezidenti Riad Rəfiyevlə münasibətləriniz necədi?
- Hər şey normaldı. Bu gün çox yaxşı futbol oynadıq və qalib gəldik. Mənə əsas lazım olan budu. Mən soyuqluq hiss etməmişəm. Hamımız situasiyanı anlayırıq. Bəlkə də kimlərsə aşırı kədərlənib. Mənim kədərlənməyə vaxtım yoxdu. Fikirləşmirəm ki, münasibətimiz pisdi.