Ölkəmizin U-21 yığması məğlubiyyətdən başqa nəticə tanımır.

Samir Əliyevin çalışdırdığı komanda Lüksemburqun ardından evdə Serbiyaya da iki cavabsız qolla uduzdu. Amma Allahın bəhanəsi çox! “Football-plus.az” xəbər verir ki, Samir Əliyev oyundan sonra jurnalistlərin suallarını cavablayıb.

- Belə məğlubiyyətdən sonra danışmaq bir az çətindi. Uşaqlar meydanda əlindən gələn hər şeyi etdi, döyüşdülər, yetərincə qol vəziyyəti yaratdıq. Komandam heyətində yüksək səviyyəli futbolçular olan rəqibə qarşı çox yaxşı mübarizə apardı. Futbolçuların hər birinə təşəkkürümü bildirdim.

- Artıq bəxt də Azərbaycan millisindən üz döndərib.
- Özünüz də gördüz ki, yetirincə qol vəziyyətləri yarada bildik. Sadəcə, bunlardan istifadə edə bilmədik. Bu qədər.

- Penaltini Nəriman Axundzadənin yerinə yetirməsini siz tapşırmışdız?
- Bəli. Lüksemburqla oyunda da penaltini Nəriman yerinə yetirmişdi. Hər deyəndə belə epizod yaranmır. O, daha təcrübəlidi. Həm avrokuboklarda, həm də çempionatda daha çox şans qazanır. Futboldu, yerinə yetirə bilmədi, məyusuq. Qol vursaydı, daha da ruhlanardıq, davamı gələ bilərdi. Amma olmadı. Əsas olan odu ki, futbolçular meydanda döyüşdülər və göstərdilər ki, futbol oynaya bilirlər. Çox bəhanə axtarmaq istəmirəm.

- Nərimanı 90 dəqiqə meydanda saxlamağınızın səbəbi nə idi?
- Ümid edirdik ki, Nəriman oyunu öz üzərinə götürər, hücumda kreativliyi artırar və komandaya faydalı olar.

- Bu sizin U-21-in baş məşqçisi kimi son ev oyununuzdu, yoxsa növbəti seçmə mərhələdə də sizi komandada görəcəyik?
- Bu sual mənə aid deyil.

- Gənc futbolçuların premyer-liqada az oynamasını necə şərh edərdiz?
- Gənclərə şans vermirlər. Futbolçular premyer-liqada 90 dəqiqə oynasalar, yaxşı olar. Vaxtımız az olur. 2-3 aydan bir yığışırıq. Futbolçular premyer-liqada oynamayanda belə əziyyət çəkirik. Rüfət Abbasov yeganə futbolçudu ki, çempionat başlayandan, demək olar, 90 dəqiqə meydanda olur. Bu gün çempionatda 15-20 dəqiqə oynamaqla Avropada belə komandalara qarşı oynamaq çətindi. Mən Samir Əliyev bu gün varam, sabah yox. Daha dərin problemlər var, bu gün danışmaq istəmirəm.

- Rəqib futbolçular da öz klublarında əsas heyət üzvləri deyil...
- Nə deyim? Qol vəziyyəti yaradıb vura bilmirik də. Çoxları deyir ki, Lüksemburq “cırtdan” ölkədi, Sumqayıt boydadı. Onların çempionatında 16 komanda iştirak edir, ordakı meydançalara baxın.

- AFFA-da səlahiyyətli şəxs olsaydız, özünüzu bu nəticələrdən sonra bu postda saxlayardız?
- Fikirləşməzdim... Əsas məqsədimizdi. Bir rəhbər kimi məşqçinin qarşısına məqsəd qoyursan. Bu gün AFFA-da rəhbərlik də başa düşür ki, futbolçular oynamır. Oynamadıqda nəticə vermək çətin məsələdi. Qarşıma 3-4-cü yer və yaxud da sonuncu yer qoyulardısa, əlbəttə, vidalaşardım.

RÖYANƏ OĞUZ