"Neftçi" Misli premyer-liqasının evdə keçirilən 14-cü tur matçında "Zirə"yə qalib gəldi - 2:1.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavablandırdı.

- Futbolçularımı təbrik edirəm. Meydanı yaxşı əhval-ruhiyyə ilə tərk etdik. Rəqib ciddi idi və bizə xeyli əziyyət verdi. Qələbələrə ehtiyacımız var. Bu gün çox sevincliyik.

- Neçə gündü ki, əsas müzakirə mövzusu millimizin durumudu. Qapıda Mehdi Cənnətovun yox, Rza Cəfərovun dayanması da bu sıradadı. İndi Fernando Santuşun istefa verəcəyiylə bağlı fikirlər səsləndirilir. Bu haqda nə düşünürsüz?
- Məğlubiyyətə görə çox üzüldük. Vaxtilə mən də millinin şərəfini qorumuşam. Belə məğlubiyyətlər yaşamışıq. Futbolçuların nə çəkdiyini təxmin edirəm. Milli bizimdi. Uduzanda hamımız mıyus oluruq. Qalib gələndı hamımız sevinirik. Belə olmalıdı. Oyunçulara uğurlar arzu edirəm. İnanıram ki, gələcəkdə yaxşı işlər görüləcək. Fernando Santuş küçədən gəlməyib. Avropa çempionudu. Namizədlərin siyahısına baxa bilsək, elə Santuşu seçərdik. Çox təcrübəlidi. Amma baş məşqçi haqda danışmaq etikadan kənardı.

- Ramil Şeydayev millinin oyunlarından sonra xeyli tənqid edildi. Rza Cəfərov da psixoloji sansıntı keçirib. Onları oyuna kökləmək çətin olmadı?
- Tərcüməçi Vüqar həm də "Neftçi"də çalışır. O, futbolçuların necə üzüldüyü bizə deyib. Təbii ki, çətin oldu. Bu məğlubiyyət işimizi birəbeş artırdı. Hər halda, futbolçunun həyatında belə hallar olur.

- Növbəti turda rəqib "Qarabağ"dı. Bugünkü qələbə əvvəlki "Neftçi"ni görməyimizə səbəb ola bilər?
- "Qarabağ"la matça hazırlaşacağıq. Azarkeşlərimiz bizi həmin oyunda da dəstəkləyəcək. Vacib oyun olacaq.

- Qələbənin əsas səbəbi istəkli olmağınız idi? Yoxsa artıq istədiyiniz sistemi tətbiq edə bilirsiz?
- İstək öndə idi. Futbolçular bir-birinə motivasiya verirdi. Hələ hansısa sistemdən danışmaq üçün tezdi. Bəlkə də istədiyimizin 10 faizini reallaşdırmışıq. Daha dinamik oynamalı, diqtə edən tərəf olmalıyıq. İstək olmasa, uğur qazana bilməyəcəyik. İstək qələbənin açarıdı.

KƏNAN BAHADIR