Qvardiola “Siti”də qalmağa qərar verdi - kataloniyalı mütəxəssis müqavilə müddətini uzatdı
«Mançester Siti”nin baş məşqçisi Pep Qvardiola daha iki mövsüm klubda qalacaq. Onunla müqavilənin müddətinin «1+1 il» sxemi üzrə uzadılması xəbəri rəsmi şəkildə açıqlanıb.
Bu haqda xəbəri «The Atletic» hələ bir neçə gün əvvəl yaymışdı. Həmin qaynaq iddia edirdi ki, Qvardiola artıq yeni müqavilənin şərtlərini razılaşdırıb. Əvvəlki müqavilənin müddəti cari mövsümün sonunda başa çatacaqdı.
Müqavilənin maliyyə tərəfləri hələ ki məlum deyil. Hazırda Pepin maaşı 23,7 milyon avro təşkil edir ki, bu da onu dünyanın ən yüksək ödənişli məşqçiləri siyahısında 2-ci yerə qoyur. Yalnız «Atletiko”nun çalışdırıcısı Dieqo Simeone daha çox (34 milyon) qazanır.
«Mirror» yayda belə bir xəbər yaymışdı ki, «Mançester Siti» kataloniyalı mütəxəssisi saxlamaq üçün maaşını ciddi şəkildə artırmağa hazırdı. Klub rəhbərliyi Qvardiolanın mümkün gedişindən narahat idi — o, artıq 9-cu mövsümdü «sükan arxasındadı». Bəzi mənbələr belə hesab edirdi ki, Pep yekun qərarı yanvarda verməyi planlaşdırır — ailəsinin fikri də onun üçün vacib idi.
Mütəxəssis bir neçə dəfə gedişi ilə bağlı şayiələri şərh etmişdi. Pepin fikrincə, klub onsuz da dağılmayacaq, ona görə ki, dəqiq qurulmuş sistem əsasında fəaliyyət göstərir. Oktyabrda belə demişdi:
«Mançester Yunayted”də nə baş verdiyini bilmirəm (Aleks Ferqyuson gedəndən sonra komandanın əvvəlki şöhrətindən uzaq düşməsini nəzərdə tutur — red.). Bir adamın gedişindən sonra hər şey korlanırsa, bu, klub üçün çox pis əlamətdi. «Siti”də nə etməli olduqlarını bilirlər: komanda yaxşı idarə olunur, əla strukturu var. Böyük, ciddi klublar bu və ya başqa fiqurdan asılı olmur. Klub güclüdüsə, qalan heç nəyin əhəmiyyəti yoxdu».
Qvardiola ilə müqavilənin perspektivinə onunla hələ «Barselona”da birgə işləyən idman direktoru Çiki Beqiristaynın gedişi təsir göstərə bilərdi. Amma Beqiristayn 60 yaşına çatandan sonra 12 mövsüm keçirdiyi «Siti”dən ayrılmağa özü qərar verdi. İspaniyalının əvəzinə idman direktoru postuna «Sportinq”dən Uqo Viana gətiriləcək. Bu xəbər hələ oktyabrdan bəllidi. Həmin vaxt «The Telegraph» yazmışdı ki, yeni direktor Portuqaliyadan özü ilə birgə Ruben Amorimi də gətirə bilər. Ancaq məlum olduğu kimi, adı çəkilən məşqçi Mançesterin digər təmsilçisini — «Yunayted”i çalışdıracaq.
Yeri gəlmişkən…
MS Qvardiolanın rəhbərliyi altında keçirdiyi 490 oyunun 360-da qələbə qazanıb, 60-da heç-heçə edib, 70-də uduzub. Top fərqi isə belədi: 1239-446.
