Futbol tarixinin ən uğurlu və güclü mütəxəssislərindən biri olan, 2016-dan bu yana ''Mançester Siti''ni çalışdıran Xosep Qvardiola ilə bağlı maraqlı bir iddia ortaya atılıb.

Football-plus.az xəbər verir ki, bu fikrin müəllifi Braziliya Futbol Federasiyasının prezident köməkçisi Fransisko Netodu.

Onun sözlərindən belə aydın olur ki, bir neçə il öncə Braziliya Qvardiolaya rəsmi təklif irəli sürübmüş. Amma kataloniyalı mütəxəssisin astronomik məbləğ ''oxuması'' təyinatın baş tutmasına mane olub: ''Təxminən 3 il öncə meneceri vasitəsi ilə Qvardiola ilə əlaqə qurduq. Meneceri bildirdi ki, Qvardiola Braziliya yığmasının təklifini qəbul etməyə hazırdı. Amma bunun qarşılığında bizdən illik 24 milyon avro maaş tələb etdi. Açığı, köməkçilərimdən biri bu məbləği eşitdikdən sonra az qala ürəktutması keçirəcəkdi. Çünki bizim təklifimiz yalnız 2 milyon avro idi. Qvardiola isə bonuslardan əlavə 24 milyon avro istədi. O, ölkəsini tərk edəcəyi və Braziliyada çalışacağı üçün düşündü ki, bu məbləğə layiqdi''. 51 yaşlı mütəxəssisin ''Mançester Siti'' ilə müqavilə müddəti gələn yay, yəni cari mövsümün sonunda başa çatır.

DÇ ilə bağlı yaranmış fasilə zamanı ''Siti'' rəhbərliyinin məşqçiyə yeni müqavilə təklif edəcəyi gözlənilir. Amma Qvardiola bir müddət öncə özü də etiraf etmişdi ki, ''Siti''dən ayrıldıqdan sonra yığma komandalardan birinin başına keçmək istəyir. O, Cənubi Amerikanın və ya Avropanın iddialı yığmalarından birinin başına keçmək istədiyini, bu təcrübəni yaşamaq arzusunda olduğunu etiraf etmişdi.