Qrupun mərkəzi oyunu Osloda keçirildi.

Ulduz baxımından heyətinin zəngin olmasına baxmayaraq, səfərdə Qazaxıstanı yenə bilməyən və ciddi tənqidlərə məruz qalan Norveç Avstriyanı evə əliboş yola saldı. Premyer-liqada “torba-torba” qollar vuran Holann yığmanı da çiynində daşıyır. Hesab 1:1 olarkən doğma meydanda qəhrəman olmaq üçün səhnəyə ondan başqası çıxa bilməzdi. Holann yığmada 35-ci oyunda 32-ci qolunu vurdu. İndi onu Norveç tarixinin ən məhsuldar oyunçusunun rekordundan cəmi 1 qol ayırır. Bu status hazırda Yorqen Yuveyə məxsusdu. Hesabında 33 qol olan Yuve bu rekordu 1930-cu illərdə müəyyənləşdirib. Çerçesovun Qazaxıstanı isə bu dəfə ümidləri doğrultmadı. Evdə Holannlı Norveçdən qol buraxmayan qazaxlar Lyublyanada pərən-pərən düşdülər. Matçın qəhrəmanı isə Şeşko oldu. Holanndan fərqli slovenlərin parlayan ulduzu göstərdi ki, qazaxların müdafiə xətti heç də keçilməz deyilmiş. Onun 23-cü dəqiqədə 3 müdəfiəçini geridə qoyduqdan sonra aşırma zərbə ilə vurduğu qol ML-də 2-ci turun bəzəyinə çevrildi. “Leyptsiq”in forvardı çox keçmədən dublunu rəsmiləşdirərək intriqanı artıq ilk yarıda öldürdü. Əslində qazaxların bu oyuna fərqli şəkildə köklənəcəyini gözləmək olardı. Çünki bu komanda AÇ-2024-ün seçmə mərhələsini uğurlu keçirməsinə baxmayaraq, son turda məhz səfərdə Sloveniyaya uduzaraq final mərhələsinə vəsiqə qazana bilməmişdi. Qazaxıstan ötən ilin noyabrında heç olmasa, rəqibinə layiqincə müqavimət göstərmiş və yalnız son anlarda buraxdığı qolla 1:2 məğlub olmuşdu. Bu dəfə isə komanda darmadağından qurtula bilmədi.

B liqası, 3-cü qrup
Norveç – Avstriya 2:1 (1:1)
Norveç: Nyulann, Ryuyerson, Osteqar, Hanke-Olsen (Qundersen, 28), Volfe, Berge, Berq (Torsbi, 46), Myure (Nusa, 46), Edeqor (Torstvedt, 67), Sörlot (Lanqas, 90), Holann.
Avstriya: Pents, Mvene (Kerfeld, 57), Poş, Linhart, Prass, Laymer, Zayvald, Şmid (Arnautoviç, 78), Zabitser, Baumqartner (Zaydl, 68), Vimmer (Ştöger, 79).
Qollar: Myure, 9 (1:0). Zabitser, 37 (1:1). Holann, 80 (2:1).
Vərəqə: Mvene, 24 – sarı.
Hakim: Nikola Dabanoviç (Monteneqro).
9 sentyabr. Oslo. 23171 tamaşaçı.

Sloveniya – Qazaxıstan 3:0 (2:0)
Sloveniya: Oblak, Brekalo (Kurtiç, 87), Drkuşiç, Biyol, Yanza, Qnezda-Çerin, Elsnik, Stoyanoviç (İliçiç, 78), Mlakar (Qorenç-Stankoviç, 65), Çelar (Vipotnik, 65), Şeşko (Balkoveç, 67).
Qazaxıstan: Şatski, Bıstrov (Skvortsov, 76), Malı (Kasım, 46), Maroçkin, Alip, Voroqovski, Taqıberqen, Zaynutdinov, Orazov (Astanov, 57), Samorodov (Çesnokov, 46), Aymbetov (Jaksılıkov, 76).
Qollar: Şeşko, 23 (1:0). Şeşko, 28 (2:0). Şeşko, 63 (3:0).
Vərəqələr: Mlakar, 20. Malı, 35. Çelar, 37 – sarı.
Hakim: Joao Pinyeyro (Portuqaliya)
9 sentyabr. Lyublyana. 9814 tamaşaçı.

1. Sloveniya 2 1 1 0 4-1 4
2. Norveç 2 1 1 0 2-1 4
3. Avstriya 2 1 0 1 2-3 1
4. Qazaxıstan 2 0 1 1 0-3 1

10 oktyabr: Norveç – Sloveniya, Avstriya – Qazaxıstan.