Şir həmişə şirdi, mənim qərdeşim,

Hələ saat 11-di, mənim qərdeşim...

(məlum meyxanadan)

Şir həmişə şirdi, mənim qərdeşim... Yox-yox, bu dəfə elə deyil. Bu şirin hay-hayı gedib, vay-vayı qalıb. Düzdü, “Qarabağ”ın baş məşqçisi Qurban Qurbanov belə fikirlərin əleyhinədi. Yekun nəticənin başqa mövzulara yozulmasından narahatdı. Məsələn, Allah uzaq eləsin, “köhlən atlar” məğlub olsa, deyərlər ki, heç belə şirə də uduzarlar? Qələbə olsa – ki, buna səmimi qəlbdən inanıram - , deyərlər, bəs, belə şiri udmağa nə var...

Qurban bəy haqlıdı. Amma reallıqlar var. Məsələn, biri odu ki, qələbənin pisi, yaxşısı olmur. Özü də Avropa Liqasında turnir cədvəli tərtib edilibsə, növbəti mərhəyə yüksəlmək şansı xal sayından asılıdısa, nəticədən başqa bütün məsələlər başqa söhbətlərin mövzusudu. Elə “Lion”un baş məşqçisi Pyer Saj da bunu dərk etdiyindən Bakıya nəticə üçün gəldiklərini etiraf edir. Amma vallah, bu şir son illərdə tarixinin kölgəsində sərinlənməkdən başqa nəsə edə bilməyib.

Məlum oldu ki, söhbət Fransadan “Tofiq Bəhramov”a gəlib “Qarabağ”ı məğlub etmək istəyən “Lion”ndan gedir. Yəni “şirlər” ləqəbi daşıyan komandadan. Onların nəriltisi əsrin əvvəllərində Liqa-1 iştirakçılarının qulağını batırırdı. 2001/02 mövsümündən başlayaraq ardıcıl 7 dəfə ölkə çempionu olan komanda bunu sonuncu dəfə 2008-ci ildə bacarıb. Bəs, sonuncu dəfə mükafatçılar sırasına nə vaxt düşüb? 2018/19 mövsümündə üçüncü olublar. Beş mövsümdü Çempionlar Liqasında çıxış edə bilmirlər. Heç Liqa-1-də də söz sahibi deyillər. İndi Fransanın ağaları PSJ, “Marsel”, “Monako”, “Lill” kimi komandalardı. “Lion” bu gün 6-cı pillədədi. Elə ötün mövsümü də 6-cı sırada başa vurub.

Bəli, şir bu gün şiri xatırlatmır. Elə “Beşiktaş” Avropa Liqasının 3-cü turunda bu komandanın meydanından qalib ayrıldı. Qısası, “Lion”u məğlub etmək mümkündü. Tam mümkün. Razıyam ki, asan olmayacaq. Hər halda, futbolçuların təcrübəsi, keyfiyyəti, çıxış etdiyi çempionatın səviyyəsi bu komandaya yuxarıdan aşağı baxmağa imkan vermir. Amma bunlar çəkinməyə də səbəb deyil. Sözümün canı odu ki, qələbə qazanmaq olar... Və nəsə fors-major hal olmasa, “Qarabağ” bunu bacaracaq! Şir artıq şir deyil, mənim qərdeşim!

KƏNAN BAHADIR