"Qarabağ" qara zolaqdadı. Təbii ki, avrokuboklardakı uğursuzluqları nəzərdə tuturuq. İndi hər kəs gözünü son beş matça dikib.

Əsas sual budu: "Qarabağ" Avropa Liqasının pley-off mərhələsinə yüksələ biləcəkmi? Növbəti rəqiblərdən xal və ya xallar almaq mümkündümü?

"Qarabağ" indiyə qədər səfərdə "Tottenhem"ə (0:3), evdə "Malmö (1:2) ilə “Ayaks"a (0:3) uduzub. Qalan rəqiblər "Bude/Qlimt" (səfər), "Lion" (ev), "Elfsborq" (səfər), FKSB (ev) və "Olimpiakos"du (səfər). Xatırladaq ki, "köhlən atlar" AL-in turnir cədvəlində 36-cı - sonuncu sıradadı. Özü də biabırçı top fərqiylə - 1:8!

Hazırda həmin rəqiblərdən yalnız "Elfsborq" "16-lıq"dan kənardadı, daha doğrusu, 22-ci pillədədi. Hətta "köhlən atlar"ın qarşılaşacağı növbəti komanda - "Bude/Qlimt" hələ məğlub olmayıb. Elə pley-offa namizədlər sırasında olan digər rəqiblər də ən pis halda uduzmamağa çalışacaq. Təbii ki, "Elfsborq" həmin yerlərə yaxın olduğundan evdə maksimum gücündən istifadə etməkdən çəkinməyəcək. Bu, "Qarabağ" üçün hər şeyin bitməsi deməkdimi? Əsla! Ona görə ki, 16-cı pillədəki "Slaviya"nın cəmi 4 xalı var. "Qarabağ" üçün gec deyil, amma qələbələrin qazanılması mütləqdi. Bu başqa məsələ ki, "Bude/Qlimt"in meydanında Elvinsiz və Romaosuz mübarizə aparmaq xeyli çətin olacaq. "Lion"un meydanında bir xal qazanmaq mümkündüsə, FKSB-ni evdə məğlub etmək real görünür. Maraqlıdı ki, "Olimpiakos" əsas mərhələdə "Lion"un meydanından məğlub ayrılıb - 0:2. Yəni ağdamlılar "Lion"dan xal qoparsa, yunanları məğlub etmək şansını artıracaq.

Bəs buna nə mane ola bilər? Cavab bəllidi: "Qarabağ"ın futbolçularının fərdi səhvləri, hücum cəhdlərinin uğursuzluqla nöqtələnməsi, müdafiə xəttindəki boşluqlar, xüsusilə meydanın mərkəzində yol verilən intizamsız davranışlar. Hər halda, bu məsələlərlə bağlı fikirlərimizi oxucularla bölüşmüşük. İndi Qurban Qurbanov və komandası çatışmazlıqları aradan qaldırmalı və xallar qazanmalıdı. Bəli, ümumi durum ürəkaçan deyil, amma hələ heç nə itirilməyib!

KƏNAN BAHADIR