“Qarabağ” sabah Avropa Liqasının 5-ci turu çərçivəsində “Lion”u qəbul edəcək.

“Football-plus.az” xəbər verir ki, Ağdam klubunun baş məşqçisi Qurban Qurbanov bu gün mətbuat konfransında jurnalistlərin suallarını cavablayıb.

- Çox keyfiyyətli komandaya qarşı oynayacağıq. Bizim üçün vacib matçdı. Pis hazırlaşmamışıq. Çalışacağıq ki, sabahkı matçda diqqətli olaq. Bu çox vacibdi. Çox istəyirik ki, azarkeşlərimizi sevindirək, uğurlu nəticə əldə edək.

- Marko Veşoviçlə Mateus Silvanın hazırlıq durumu start heyətində meydana çıxmağa imkan verir?
- Pis deyil. Hər iki futbolçunun hazırlığı yaxşı səviyyədədi. Bu gün və sabah tam qəti qərar verəcəyik ki, onlar əsas heyətdə olacaq, ya yox. Ümumi hazırlıqlarından razıyam.

- Fransa klubu maddi və mənəvi cəhətdən çökmüş komandadı. Bu amillər sizin qələbə şansınızı artırır?
- Heyətləri ilə maraqlanmışıq. Oyunlarına da baxmışıq, təhlil etmişik. Öz heyətimiz də bəllidi. Kimin meydanda olacağı aydın məsələdi. Sadəcə, 1-2 sual doğuran mövqe var. Rəqibə gəlincə, böhran oldu və ya olmadı - biz qələbə üçün hazırlaşırıq. Bunlar hamısı söz-söhbətdi. Belə böyük klubların maliyyə böhranını yoluna qoymasında ciddi problem görmürəm. Hər il istənilən böyük klubda belə söz-söhbət gəzir. Belə hallarda onlar 1-2 oyunçusunu başqa kluba satır, problemi həll edirlər. Oyunçularının dəyəri yüksəkdii. Oyuna belə fikirlərlə yanaşmaq bizlər, sizlər üçün doğru olmaz. Məğlub olanda da fikirlər olur ki, belə problemi olan kluba qalib gələ bilmədilər. “Lion” illərin klubudu.

- Rəqibin “Lion” olduğunu nəzərə alsaq, digər komandalarla oyunlara necə hazırlaşmısızsa, bu oyuna da eyni yanaşma olacaq?
- Biz həmişə çalışmışıq ki, öz oyunumuzu yaxşılaşdıraq. İlk silahımız bu olmalıdı. İstənilən rəqibin üstün cəhətlərinin qarşısını almalıyıq. Hər komandanın üstün cəhətləri var. Sadəcə, bir neçə detal, element var ki, digər rəqiblərə qarşı necədirsə, bu rəqibə qarşı da o detallarda diqqətli olmalıyıq. Hər matçın gedişində 1-2 dəyişiklik olur. “Lion”un üstün keyfiyyətini nəzərə alıb, detallara fikir verməliyik. Hücum planımızda da çox yox, 1-2 əlavə düşüncə olacaq. Həyata keçəcək, ya yox - oyunun axarından asılıdı.

- “Lion”u hansı xüsusi keyfiyyətlərə görə təəccübləndirəcəksiz?
- Bayaq dedim ki, çox keyfiyyətli komandaya qarşı oynayacağıq. Ən böyük gücümüz kollektiv oyuna üstünlük verməyimizdi. Həm hücumda, həm də müdafiə xəttində belədi. Çünki bu gün komponentlərə baxsaq, “Lion” bizdən üstün görünür. Daha yaxşı liqada oynayır, daha böyük klubdu. Amma bizim Avropada böyük təcrübəmiz var. Bundan istifadə edərək, belə komandalara qarşı düzgün oynamağa çalışmışıq. Bir neçə detal var ki, bütün komandalara qarşı oyunlarda tətbiq edirik. Kollektiv şəkildə çalışacağıq ki, lazım olan nəticə üçün meydanda ən doğrusunu edək.

RÖYANƏ OĞUZ