"Qarabağ" sabah Avropa Liqasının 2-ci turu çərçivəsində "Malmö"nü qəbul edəcək.

"Football-plus.az" xəbər verir ki, ağdamlıların baş məşqçisi Qurban Qurbanov oyundan öncə jurnalistlərin suallarını cavablayıb:

- Həqiqətən vacib oyuna çıxırıq. Doğma meydanda, öz azarkeşlərimiz önündə ilk oyundu. Həm də vacib matçdı. Özünəməxsus oyun tərzi olan komandaya qarşı oynayacağıq. Hazırlığımız pis getmir. Bəzi problemlərimiz var. Hər halda, çalışırıq ki, komandanı oyuna tam hazırlayaq. Yaxşı oyun göstərməyə və maksimum yaxşı nəticə qazanamağa çalışacağıq.

- Mateus Silva ilə Marko Yankoviçin durumu nə yerdədi? Sabahkı oyuna hazırdılar?
- Mateusla bağlı problem var. Yəqin ki, bir neçə oyun olmayacaq. Yankoviçə gəlincə, tam qərar verməmişik. Ümumi durumu pis deyil. Çoxdan əsas heyətdə oynamırdı. "Sabah"la oyunda bəlkə də dəqiqələri çox oldu. Həmin görüşdə 60-65 dəqiqə oynamalıydı. Amma oyunun axarına görə uzandı. Bu gün və sabah vaxtımız var. Ən doğru qərarı verməyə çalışacağıq. Xüsusən də futbolçu üçün.

- "Qarabağ"ın İsveç klublarına qarşı üstünlüyü var. Bunu nəzərə alıb, sabahkı matçda nəyə ümid edə bilərik?
- Statistikaya baxsaq, bəli, belə nəticələrimiz var. Bizim üçün onlara qarşı oynamaq ən gərgin oyunlardan olub. Çünki onların ümumi fiziki hazırlığı və oyun tərzi başqa formadadı. "Malmö"nün oyun tərzi fərqlidi, böyük təcrübəsi var. Həmişə çalışmışıq və istəmişik ki, ən azı Bakıda yaxşı nəticə əldə edək. Amma futbol get-gedə elə səviyyəyə gəlib çıxıb ki, istənilən ölkənin komandasında böyük irəliləyiş var. Biz azarkeşlərə çalışmışıq ümid verək. Onlar da bizə inanıb, güvəniblər.

- "Qarabağ" sabahkı rəqibə hansı sürpriz hazırlayıb?
- Belə oyunlara hazırlaşmaq üçün vaxtımız az oldu. Amma məşq sayı çox olsaydı, yaxşı idi. Yalnız bu gün bütün komanda ilə oyuna hazırlaşa biləcəyik. Bir də bəlkə sabah vaxtımız olacaq. Ola bilər ki, oyunumuzun qurulmasında bir neçə dəyişiklik edək. Çünki fərqli rəqibdi. Alınacaq, ya yox - bilmirəm. Rəqib bizə nə qədər şərait yaradacaq, ona baxacağıq. "Malmö" heç bir rəqibdən çəkinmir. Maraqlı oyun olacaq. Futbolçularımın üzərinə böyük məsuliyyət düşəcək, böyük güc sərf etməli olacaqlar. Futbolçularım buna dözməlidi. Bəzi epizodlarda öz oyun tərzimizdən kənara çıxa bilərik.

- Bəzi mütəxəssislər "Malmö"nü 3 xal gözü ilə görür. Bu istək, bu tələb nə dərəcədə komandanın əleyhinə ola bilər?
- Bu, bizə olan güvəndi, inamdı. Öz meydanımızda oynayırıq. Belə fikirlər futbolçulara əlavə motivasiya verir. Bu fikirlərin xeyri var, ziyanı yoxdu.

- Avropa Liqasının yeni formatda keçirilməsi "Qarabağ"a müsbət təsir edir, yoxsa qrup mərhələsi daha münasib idi?
- Hələ ki bir az uyğunlaşmamışıq. Bizim kimi klublara, bizim kimi futbol ölkələrinə bəlkə qrupdda olmaq daha çox sərf edər. Bir var 3-4 komandanı təhlil edirsən, qışa qədər onlara hazırlaşırsan. Bir də var 36 komandanın bütün oyunlarını gözləyirsən. Elə rəqiblər var ki, bəlkə onlara qarşı evdə oynamaq istəyərdin, səfərə yollanırsan. Belə hallar var. Amma bunlar problem yaratmalı deyil. Hamı üçün eynidi. Əvvəl-axır buna öyrəşməliyik. Əvvəl 1-2 oyunun nəticəsini gözləyirdik, indi hər tur bütün oyunların nəticəsini gözləyirik. Əvvəl 2 komandaya baxırdıq, indi bütün oyunlara. Həm sizin, həm də bizim işimiz çoxalır. Ümid edirəm ki, uğurlu nəticə qazanaraq azarkeşlərimizi sevindirərik.

RÖYANƏ OĞUZ