"Çox gözəl bir mövzuya toxunmusuz, son 5 ildə ölkədə hər mənada şiddət artıb. Bu, futbola da təsir edib. Artmasının səbəbi isə futboldan başı çıxan, işini bilən insanlara hörmət edilməməsidi. Deyək ki, adam iş adamıdı, iddia edir ki, mən bu işi sizdən daha yaxşı bilirəm, pul verirəm, mənim dediyim olacaq. Bu da şiddətə səbəb olur. Baş məşqçi, köməkçi məşqçilər rəhbərliyə görə işləyir. Rəhbərlik üçün işləyən məşqçinin isə ömrü az olur - ya iki, ya da üç oyun. Sonra bir də gördüz ki, çalışdırıcını göndəriblər. Azarkeşlər isə həmişə komandalarının qalib olmasını istəyirlər. Baxmayaq ki, Avropada udan da, uduzan da bir-birini təbrik edib ayrılır. Ancaq bizim bu müsəlman ölkələrində şiddət gündən-günə artır. “Biz qazanmalıyıq” deyə-deyə xaos yaradırlar. Bu tip səbəblərə görə futbolda şiddət gün keçdikcə artır və bu sahəyə olduqca ziyan vurur. İnsanlar da artıq futboldan uzaqlaşmağa başlayıb, onlarla əlaqə qurmağa çalışmaq belə çətinləşib. Ümid edirəm ki, bu problemlər tezliklə aradan qalxar".