İbrahim Uzunca: "Onlardan xahiş etdim ki, bizi bu liqaya buraxsınlar" - AÇIQLAMA
“Oyunda üstün tərəf, topa daha çox sahib olan komanda idik. Qapımız istiqamətinə 1 top gəldi, o da qol oldu. Son dəqiqədə penaltidən yararlana bilmədik. Final matçlarında qol vurmalısan. Bunu bacarmadıq. Əlimizə düşən fürsətləri qaçırdıq. Amma oyunda üstün tərəf biz idik. “Cəbrayıl”ı təbrik edirəm. Dəyişə biləcəyimiz heç nə yoxdu. Həyat davam edir".
Bu sözləri "Futbol+" qəzetinə açıqlamasında "Xan Lənkəran"ın baş məşqçisi İbrahim uzunca deyib. Türkiyəli mütətəxəssis Region Liqasının finalında "Cəbrayıl"a məğlub olmaqlarını şərh edib. Lənkəran təmsilçisinin çalışdırıcısı 11 metrlik cərimə zərbəsini qaçırdıqları epizod haqda danışıb:
"Komandanın penalti vuran futbolçuları var. Əvvəlcədən adlarını yazmışdım. Birinci Röyal Nəcəfovu qeyd etmişdik. Daha sonra Aqşin idi. Zaur oynayanda o vurur. Qarşılaşmadan öncə hamısı qeyd olunmuşdu. Penalti epizodu zamanı Aqşin vurmaq istəyib. Adı da siyahıda olduğu üçün Röyal icazə verib ki, zərbəni yerinə yetirsin. Futboldu, belə şeylər olur".
İbrahim Uzunca federasiyanın "Xan Lənkəran"ı 1-ci diviziona buraxmaması haqda da fikirlərini səsləndirib:
"Mükafatlandırma mərasimində AFFA rəhbərliyi ilə danışdım. Onlardan xahiş etdim ki, qərar haqda yenidən düşünsünlər. Bu komandanın heyəti, azarkeşləri imkan verir ki, 1-ci divizionda çıxış edək. Onlardan xahiş etdim ki, bizi bu liqaya buraxsınlar. İnşallah, nəsə edərlər. Bu komanda layiq olduğu yerdə oynamalıdı. “Araz Naxçıvan”la oyunda yaşananlar bu görüşdəki çıxışımıza təsir etmədi. Biz hər komanda ilə oynamağa hazırıq. Onlar öz səhvləri ucbatından finaldan kənarda qaldılar. Bizlik bir şey yox idi. Qayda nədisə, elə də oldu. Cavid Hüseynovu təbrik edirəm. İlk illərində möhtəşəm komanda formalaşdırdılar. Çempion olmağı bacardılar. Bizə də təbrik etmək düşər”.
İLKİN SULTANLI
Digər xəbərlər
