Avropa Liqasının əsas mərhələsində 4-cü tura yekun vuruldu.

Tur ''Fənərbaxça'' üçün uğursuz alındı. Niderlandda ''Alkmaar''ın qonağı olan Joze Mourinyonun komandası 1:3 hesabı ilə məğlub oldu. İlk yarısı qolsuz başa çatan görüşdə bütün qollar fasilədən sonraya təsadüf etdi. Maraqlıdı ki, 4 qolun hamısı sonradan meydana çıxan futbolçular tərəfindən vuruldu. Oyun bu baxımdan AL-in tarixinə düşdü. ''Fənər''də yeganə qolun müəllifi olan Ən-Nəsirinin həm də bir penaltini boşa verdiyini bildirək.

Mourinyonun çalışdırdığı komanda AL çərçivəsində Niderland klublarına qarşı 4-cü səfər oyununda da qələbəyə həsrət qaldı (1 heç-heçə, 3 məğlubiyyət). Bu mövsüm AL-də ilk dəfə uduzan ''Fənər'' 4-cü turu 5 xalla tamamladı. Ən əsası komandanın AL-in qrup/əsas mərhələsində 10 oyunluq məğlubiyyətsiz seriyası qırıldı. ''Sarı-lacivərdlilər'' şəxsi rekordu yeniləyə bilmədilər. ''Fənər'' daha öncə 2009-12-ci illərdə də AL-in qrup mərhələsində ardıcıl 10 oyunda uduzmamışdı.

ƏLİ