Türkiyə çempionatında dünən böyük səbirsizliklə gözlənilən derbi baş tutdu.

6-cı tur çərçivəsində ''Fənərbaxça'' ''Qalatasaray''ı qəbul etdi. Joze Mourinyolu ''Fənər'' ümidləri doğrultmadı. ''Qalatasaray'' əbəs yerə son iki ilin çempionu olmadığını göstərdi. Bu mövsüm ilk 5 turun 4-də qapısını toxunulmaz saxlayan ''Fənər'' bu dəfə ilk yarıda iki top buraxdı. 20-ci dəqiqədə Torreyranın uzaq məsafədən zərbəsindən sonra dirəyə dəyən top Livakoviçə toxunaraq qapıya daxil oldu.

Çox keçmədən Osimhenin ötürməsindən sonra Mertens fərqi artırdı. İkinci hissədə Sara hesabı darmadağın həddinə çatdırdı. ''Sarı-lacivərdlilər''in gücü yalnız Cekonun penalti qoluna çatdı. Beləliklə,

''Qalatasaray'' mövsümə 6 qələbə ilə başlamaqla şəxsi rekordunu təkrarladı. Komanda daha öncə 2009/10-da ilk 6 turda xal itirməmişdi. Okan Buruk klub tarixində bunu bacaran ilk yerli məşqçi oldu.

Bundan başqa Buruk ''Qalatasaray''ın başında ''Fənərbaxça''ya qarşı ilk 3 səfər oyununda uduzmayan (2 qələbə, 1 heç-heçə) cəmi 2-ci məşqçi oldu. Daha öncə bunu 1985-86-cı illərdə Yupp Dervall (1 qələbə, 2 heç-heçə) bacarmışdı.

Ən əsası ''Fənərbaxça''nın Türkiyə çempionatında 25 qələbə, 7 heç-heçədən ibarət 32 oyunluq məğlubiyyətsiz seriyası qırıldı. Bu, klub tarixinin rekord seriyası idi. Və nəhayət, ''Qalatasaray'' superliqada ardıcıl 12-ci səfər qələbəsini qazanmaqla ''Fənər''in 2011-ci ildə müəyyənləşdirdiyi rekordu təkrarladı.

ƏLİ