''Fənərbaxça'' Çempionlar Liqasında 3-cü təsnifat mərhələsinin cavab oyununda ''Lill''i qəbul etdi.

Görüş İstanbul nəhəngi üçün çox dramatik alındı. Ötən həftə Fransada 1:2 hesabı ilə uduzan Joze Mourinyonun komandası bu dəfə Bafode Diakitenin əsas vaxta əlavə olunmuş 1-ci dəqiqədəki avtoqolu ilə oyunu əlavə vaxta daşıdı. 109-cu dəqiqədə qonaqlar hətta azlıqda qaldılar. Amma sonluq yenə də ''sarı-lacivərdlilər'' üçün uğursuz alındı. 118-ci dəqiqədə Oostervoldenin əllə oyununa görə təyin olunan penaltini David dəqiq yerinə yetirdi. Son saniyələrdə Cenk Tosunun çətin vəziyyətdə vurduğu baş zərbəsi türkiyəli fanatları həyəcanlandırsa da, top tirdən geri döndü.

Beləliklə, ''Fənər''in Avropanın bir nömrəli klub turnirində qrup mərhələsi həsrəti 16 ilə yüksəldi. Komanda sonuncu dəfə bu turnirin qrupunda 2008/09-da çıxış edib. Bundan başqa Mourinyo da məşqçi karyerasında uğursuz bir ilki yaşadı. Belə ki, onun çalışdırdığı komanda ilk dəfə avrokubokların təsnifatında mərhələ adlaya bilmədi! Buna qədər onun kollektivləri 5 dəfə təsnifat da oynamış və hamısında mərhələni adlayan tərəf olmuşdu. Bu siyahıya ''Fənər'' özü də daxildi. Çünki komanda bundan əvvəlki mərhələdə ''Luqano''nu mübarizədən kənarlaşdırmışdı.

ƏLİ