''Fənərbaxça'' üçün Çempionlar Liqası macərası yenə erkən başa çatdı.

"Football-plus.az" xəbər verir ki, dünən İstanbul nəhəngi 2-ci təsnifat mərhələsinin cavab oyununda Kiyev ''Dinamo''u ilə qarşılaşdı. Bir həftə öncə Polşada keçirilən birinci görüş qolsuz başa çatmışdı. Bu dəfə əsas vaxtı 1:1 hesabı ilə başa çatan oyunda əlavə vaxt oynanıldı. ''Fənər'' İsmayıl Yüksəkin ikinci sarı vərəqəni aldığı 53-cü dəqiqədən etibarən azlıqda oynadığından əlavə vaxtda yorğunluq öz sözünü dedi və matçı penaltilər seriyasına daşıya bilmədi.

Özü də ''Dinamo''nun qələbə qolunu məhz sabiq ''Fənər''li Aleksandr Karavayev vurdu. Matç qalmaqalsız ötüşmədi. Belə ki, 57-ci dəqiqədə Buyalski hesabı açarkən qol sevincini düz ''Fənər''li fanatların qarşısında qeyd etdiyi üçün sarı vərəqə aldı. Buna cavab olaraq isə ''Ülkər'' stadionunun qapı arxasındakı tribunasında toplaşan fanatlar ''Vladimir Putin'' təzahüratını səsləndirməyə başladılar. ''Dinamo''nun ünlü çalışdırıcısı Mirça Luçesku isə bu hərəkətə etiraz əlaməti olaraq oyunsonrası mətbuat konfransına qatılmaqdan imtina etdi! Rumıniyalı mütəxəssis oyundan sonra miks zonada verdiyi açıqlamada ''Fənər'' azarkeşlərindən bu cür hərəkət gözləmədiyini vurğuladı. Qeyd edək ki, ''sarı-lacivərdlilər'' mübarizəni Avropa Liqasında davam etdirəcəklər. Komanda bu turnirin 3-cü təsnifat mərhələsində ''Slovaçko'' ilə qarşılaşacaq. Onu da bildirək ki, İstanbul nəhənginin ÇL-də qrup mərhələsi həsrəti 14 ilə çatdı. Komanda Avropanın ən mötəbər klub turnirinin qrup mərhələsində sonuncu dəfə 2008/09 mövsümündə oynayıb.