Ukrayna çempionatında uduzmayan iki komanda qaldı – “Dinamo” və “Aleksandriya”. Məhz onlar turnir cədvəlinə başçılıq edir. Yalnız topların daha yaxşı fərqi kiyevlilərin zirvədə qalmasına səbəb olub.

“Dinamo”nun aşkar autsayder “İnqulets”i məğlub edəcəcəyinə heç kimin şübhəsi yox idi. Artıq 3-cü dəqiqədə hesabı açan kiyevlilər hissənin sonuna qədər daha üç qol vurdu. Qonaqlar isə bunlardan birinin əvəzini çıxdı. İkinci hissədə də hücumları davam etdirən “Dinamo” bir neçə oyuna bəs edəcək qədər qol vəziyyəti yaratdı. Ancaq Şaparenkodan başqa fərqlənən olmadı. 5:2 hesabıyla qələbə qazanan “Dinamo”nu həftəiçi Avropa Liqasında “Ferentsvaroş”la çətin oyun gözləyir.

“Çernomorets”ə qalib gələn “Şaxtyor” 3-cü pilləyə yüksəldi. Bu oyunda bütün qollar 1-ci hissədə vuruldu. Hesabı 17-ci dəqiqədə açan donetsklilər cəmi 3 dəqiqə sonra qapısında qol gördü. Bununla belə, ilk yarının sonunda Bondarenko künc zərbəsinin ardından tirdən dönən topu təkrar zərbə ilə qapıdan keçirdi. 2-ci hissədə təhlükəli vəziyyətlər olmadı. “Şaxtyor”un futbolçuları bu oyunda bir-birinə 691 ötürmə verdi ki, bu da cari mövsüm üçün klub rekordudu.

Hesabat turundan əvvəl üç komandanın məğlubiyyəti yox idi. Onlardan ikisi – “Aleksandriya” ilə “Polesye” üz-üzə gəldi. İlk 20 dəqiqədə yorulmadan hücum quran rəqiblər ardından səssizliyə qərq oldu. Onlar hücumla müqayisədə müdafiəyə daha çox diqqət yetirməyə başladı. Sonradan meydana çıxan Vendell topa elə ilk toxunuşunda “Aleksandriya”nın qapısına yol tapa bilərdi. Ancaq qapıçı ona mane oldu. Meydan sahibləri 83-cü dəqiqədə hesabı açdı. Braziliyalı Bezerranın zərbə mövqeyinə çıxardığı Smırnı şansı qaçırmadı. Məğlubiyyətsiz oyunlar seriyasını 16-ya çatdırmaqla klub rekordunu təkrarlayan “Aleksandriya” hələ də zirvəyə şərikdi. Belə seriyası 10 oyunda dayanan “Polesye” isə artıq 4-cü pillədədi. Yeri gəlmişkən, soydaşımız Emil Mustafayev 67-ci dəqiqədə meydana çıxsa da, jitomirlilərə yardım edə bilmədi.

“Karpatı”ya “Levıy bereq”in müdafiəsini yarmaq və çempionatda ardıcıl 3-cü qələbəsini qazanmaq üçün 70 dəqiqədə artıq vaxt lazım oldu. Bu 3 xal lvovluları turnir cədvəlində 5-ci pilləyə qaldırdı. Elitanın debütantı “Levıy bereq”in qələbəsiz və qolsuz oyunlar seriyası isə 7-yə çatdı. Daha bir oyunda “Vorskla” evdə “Kolos”a uduzdu. “Kolos” son 5 turda ilk qələbəsini qazandısa, “Vorksla” ardıcıl 9-cu oyunda qələbəyə həsrət qaldı.

Turun qalan oyunlarına gəlincə, “Obolon” – “Veres”, “Krivbass” – “Rux” oyunları heç-heçə bitdi, LNZ səfərdə “Zarya”ya qalib gəldi.

12-ci tur
Dinamo – İnqulets 5:2
Vanat, 3; 44. Kabayev, 25. Malış, 39-öz qapısına. Şaparenko, 73 – Kislenko, 34. Mixavko, 57-öz qapısına.
Dinamo: Buşan, Belovar, Dubinçak, Karavayev (Rubçinski, 72), Mixavko, Tımçik, Brajko, Buyalski (Yarmolenko, 72), Vanat (Gerrero, 85), Kabayev (Voloşin, 81), Şaparenko (Mixaylenko, 81).

Şaxtyor – Çernomorets 2:1
Zubkov, 17. Bondarenko, 45 – Qabelok, 20.
Şaxtyor: Riznık, Qram, Konoplya, Matviyenko, Pedro Enrike, Bondarenko (Eginaldo, 68), Sudakov, Qomes (Stepanenko, 56), Neverton, Zubkov, Sikan (Pedrinyo, 68).

Aleksandriya – Polesye 1:0
Smirnı, 83.

Karpatı – Levıy bereq 3:0
Podlepenets, 71. Oçeretko, 75-p. Çaçua, 90+1.

Vorskla – Kolos 0:1
Salabay, 69.

Obolon – Veres 0:0
Krivbass – Rux 1:1
Zaderaka, 47 – Karabin, 36.

Zarya – LNZ 1:2
Miçin, 23 – Topalov, 60. Bessala, 80.

1. Dinamo 11 9 2 0 27-8 29
2. Aleksandriya 11 9 2 0 18-7 29
3. Şaxtyor 11 7 2 2 28-11 23
4. Polesye 11 6 4 1 19-8 22
5. Karpatı 12 5 3 4 15-14 18
6. Krivbass 11 5 3 3 12-10 18
7. LNZ 12 5 3 4 15-17 18
8. Rux 11 3 6 2 16-7 15
9. Zarya 12 5 0 7 12-14 15
10. Veres 12 2 6 4 12-16 12
11. Çernomorets 12 3 3 6 8-13 12
12. Kolos 12 2 6 4 7-9 12
13. Vorskla 12 2 4 6 11-18 10
14. Levıy bereq 12 2 2 8 4-17 8
15. Obolon 12 1 3 8 5-26 6
16. İnqulets 12 0 5 7 9-23 5

Bombardirlər: Nazarenko (Polesye), Sudakov (Şaxtyor) – 7.

Növbəti turun oyunları noyabrın 8-10-u aralığında keçiriləcək: Çernomorets – Vorskla, Levıy bereq – İnqulets, LNZ – Obolon, Aleksandriya – Karpatı, Kolos – Krivbass, Veres – Rux, Şaxtyor – Zarya, Dinamo – Polesye.