Kərəm Aktürkoğlu ''Benfika''da adından söz etdirməkdə və komandaya inanılmaz fayda verməkdə davam edir.

Şənbə günü Portuqaliya çempionatının 10-cu turunda ''Benfika'' ''Farense''nin qonağı oldu. Meydan sahibləri 15-ci dəqiqədə hesabı açalar da, qonaqlar geridönüş etməyi bacardılar. Alvaro Fernandes və Pavlidisin qolları ''Benfika''ya çempionatda ardıcıl 5-ci qələbəni qazandırdı.

Kərəm bu dəfə meydanı qolsuz tərk etsə də, əvəzində hər iki qolda yaxından iştirak edərək aktivinə məhsuldar ötürmələr yazdı. Düzdü, ikinci qolda Kərəmin ötürməsi zamanı top bir balaca müdafiəçiyə toxunduğundan bəzi mənbələrdə bu, məhsuldar ötürmə kimi qeyd olunmayıb.

Əla formada olan 26 yaşlı futbolçu ''Qartallar''ın heyətində 9-cu rəsmi oyunda göstəricilərini 8 qol, 4 məhsuldar ötürməyə çatdırdı. O, bu 9 rəsmi oyunun hər birində ən azı bir qolun vurulmasında yaxından iştirak edib. ''Benfika'' növbəti oyununu Çempionlar Liqasında keçirəcək və Münhendə ''Bavariya''nın qonağı olacaq.

ƏLİ