Kərəm Aktürkoğlunun Portuqaliya karyerası inanılmaz şəkildə davam edir.

''Qalatasaray''dan 12 milyon avroya transfer edilən Türkiyə yığmasının üzvü ''Benfika''da sanki qanad açıb uçur. O həm vurduğu qollar, həm də ''Harri Potter'' sevinci ilə indidən ''Benfika'' fanatlarının qəlbini fəth etməyi bacarıb. Kərəm bu mövsüm yeni formatda keçirilən Çempionlar Liqasının əsas mərhələsində meydana çıxdığı hər 3 oyunda qol vurmağı bacaran yeganə futbolçudu! 25 yaşlı vinger son olaraq Portuqaliya çempionatında ''Benfika''nın evdə ''Riu Ave''ni 5:0 yendiyi qarşılaşmada ilk yarıda het-trik etməklə diqqətləri yenidən üzərinə çəkdi. Bu, Kərəmin peşəkar karyerasındakı 5-ci het-triki oldu. O daha öncə sentyabrda Türkiyə yığmasının heyətində İslandiyaya, eləcə də ''Qalatasaray''ın heyətində 2022-nin noyabrında superliqada ''İstanbul BŞ''yə, 2021-in aprelində superliqada ''Göztəpə''yə və 2020-nin iyulunda Türkiyə kubokunda ''Ərzincanspor''un heyətində ''Hopaspor''a qarşı oyunda het-trik etmişdi.

Cəmi 12 milyon avroya almasına baxmayaraq Portuqaliya mətbuatının yazdığına görə ''Benfika'' bu futbolçunu heç 40 milyon avroya da satmağa razı deyil. Aktürkoğluna indidən ''Mançester Yunayted'', ''Atletiko'' kimi nəhənglər maraq göstərir. Türkiyəli ulduz ''Qartallar''ın heyətində 7 rəsmi oyunda 8 qol, 2 məhsuldar ötürməlik mükəmməl performans ortaya qoyub.

ƏLİ