Qaranın De Byazi ilə görüşünə imkan verməyiblər - “Şəxsən mənə elə bir müraciət olmayıb”
Başa çatmaqda olan həftənin maraqlı xəbərlərindən biri də Qara Qarayevin “Araz-Naxçıvan”a transferidi.
Qaranın karyerasında qara zolaq bitdi, yenidən ağ zolaq başladı. Futbolçu bir ay öncə karyerasını bitirə də bilərdi ki, çoxları elə məhz bunu düşünürdü. “Neftçi”dən vaxtsız ayrılmaq məcburiyyətində qalan Qaraya Elmar Baxşıyev inandı, öz yayına çəkdi.
“Qarabağ” yetirməsi olan, Çempionlar Liqasında, Avropa Liqasında forma tərlədən, “Neftçi” kimi köklü klubun oyunçusu olmuş Qarayevə, görünür, bu cür isti münasibət lazım imiş. Transferin ardından “Report”a müsabibə verən 32 yaşlı futbolçuya yığma ilə bağlı da sual ünvanlanıb.
- Azərbaycan millisinin sabiq baş məşqçisi Canni de Byazi tərəfindən heyətdən kənarlaşdırılmağınızı necə xatırlayırsız?
- Əslində hər şeyin kökü milli komandaya dayanır. Həmin vaxt yığmadan çox incimişdim. Baş məşqçi heç bir səbəb olmadan məni heyətdən çıxardı. Təəssüf ki, mənə qarşı bu addımdan sonra heç kim yanımda olmadı. O, mətbuata açıqlamışdı ki, hər kəs millidə qələbəyə sevinərkən Qara kənarda dayanmışdı. Bu çox gülünc söhbət idi. Üzüldüyüm məqam o idi ki, bu məsələdən sonra heç kim yanımda olmadı. Onun qərarına təsir edə biləcək insanların dəstəyini görmədim. Bildirmişdim ki, De Byazi ilə görüşmək, söhbət etmək istəyirəm. Hardasa səhvim varsa, özümə desin, mən də ona hər şeyi izah edim. Amma məni onunla görüşdürmədikləri üçün çox incidim”.
Bu məqamda ağla bir çox adam gəlir ki, Qaranın italiyalı mütəxəssislə görüşməsinə yardım edə bilərdi. İlk növbədə də millimizin sabiq çalışdırıcısı, De Biyazinin köməkçisi Arif Əsədov. Onunla əlaqə saxlayaraq Qaranın iradına izah verməsini istədik:
“Hə, müsahibəni mən də oxudum. Amma burda Qaranın işarə etdiyi kimdi, onu deyə bilmərəm. Şəxsən mənə elə bir müraciət olmadığından fikir söyləyə bilmərəm. Amma mən millinin müvəqqəti məşqçisi olanda da Qara "Neftçi"də idi. Müsahibələrimdə də bildirirdim ki, hər zaman qapı açıqdı. Sadəcə, o dönəmdə Qara əsas heyətdə oyňamırdı. Bir futbolçu, bir insan kimi həmişə onun haqda müsbət fikirdə olmuşam. Mənə elə bir müraciət olmayıb ki, mən onu görüşdürməyim və yaxud görməzdən gəlim. O baxımdan nəsə deyə bilmərəm. Qaraya ancaq uğurlar arzulayıram. Həmişə demişəm ki, Qara Azərbaycan futbolunda adından söz etdirmiş futbolçulardandı. Bu baxımdan onun hələ də oynamaq gücü var, hər komandaya kömək edə bilər. Ona ancaq uğurlar arzulayıram”.
RÖYANƏ OĞUZ
Digər xəbərlər
