Aslan Kərimov: “De Byazinin boy məsələsini səbəb göstərməsi bəhanədi” - AÇIQLAMA
“Qarabağ”ın yarımmüdafiəçisi Qara Qarayevin milli komandaya dəvət olunmaması müzakirə mövzusudu.
Bununla bağlı yığmanın baş məşqçisi Canni de Byaziyə mətbuat konfransında sual da ünvanlandı. İtaliyalı mütəxəssis isə cavabında Qaranın bunun səbəbini bildiyini dedi. Bundan sonra bütün diqqətlər futbolçuya yönəldi. O da öz növbəsində boyuna görə milliyə çağrılmadığını bildirdi.
Maraqlıdı, futbolçunun bəstəboy olması milli komandaya çağrılmamasına səbəb ola bilər? Qarayevin oynadığı mövqedə ucaboya ehtiyac var? Bununla bağlı vaxtilə millidə dayaq yarımmüdafiəçisi kimi çıxış edən Aslan Kərimova müraciət etdik:“Gülməlidi. Amma olur belə şeylər. Məşqçi kimi danışsaq, yarımmüdafiəçi növqeyində boyun bir o qədər də önəmi yoxdu. Uzun oynayan komandasansa, müdafiəçilərin və hücumçuların ucaboy olmalıdı. Çünki yarımmüdafiəyə uzun hava ötürmələri edilmir. Lakin köhnə italyan baş məşqçilərdən bəziləri komandasına oyunçu alanda boya xüsusi önəm verirdi. Yadıma gəlir, “Milan”ın sabiq baş məşqçisi Fabio Kapello komandaya boyu 180 sm-dan aşağı olanları götürmürdü. Onların seçim imkanı da geniş olurdu. Amma Azərbaycan futbolunda Qaranın oyununu hamı görüb. Çox güman, biz meydanın mərkəzində aqressivlik və mübarizə istəyirik. Bu baxımdan hesab edirəm ki, De Byazinin boy məsələsini səbəb göstərməsi bəhanədi. Oyunçu tipi olaraq Qaranı bəyənməyə bilər. Ola bilsin, Eddi İsrafilov kimi ucaboy oyunçular istəyir. Amma belə dediyi halda Aleksey İsayevin orda oynaması uyğun deyil. Emin Mahmudovun da həmçinin. Hesab edirəm ki, onun boyu heç də Qaranın boyundan böyük deyil. Futbolçunun oyun tipi xoşuna gəlmirsə, bunu açıq şəkildə demək lazımdı. Boyunu bəhanə etmək etik cəhətdən də düzgün deyil. Bu mənim də başıma gəlib. Bir məşqçi var idi, məni milliyə çağırmadı. Və dedi ki, bu mövqedə daha texnikalı futbolçunun oynamasını istəyir. Ona deyiləcək bir şey yoxdu. Ola bilər ki, oyun üslubun məşqçiyə uyğun deyil. Amma boyun buna səbəb olduğunu demək doğru yanaşma deyil. De Byazi Qaraya desəydi ki, "Emin daha texnikalıdı, ona görə onu oynadacam", buna görə heç kim ona bir söz deyə bilməzdi. Bu mənim subyektiv fikrimdi. Mənə görə Qara millinin əvəzolunmaz futbolçusudu. Açıqlama verəndə də gərək səmimi danışasan”.
ŞAİR ABDULLA
Digər xəbərlər
