"Bu, bizim üçün siqnal olmalıdı" - Azər Bağırov
"Araz-Naxçıvan" Misli premyer-liqasının 5-ci turunda "Kəpəz"in qonağı olub.
"Football-plus.az" xəbər verir ki, Muxtar Respublika təmsilçisinin baş məşqçisi Azər Bağırov matçdan sonra keçirilən mətbuat konfransında jurnalistlərin suallarını cavablandırıb. Sizi mütəxəssisin fikirləriylə tanış edirik:
"Oyunun çətin olacağını bilirdik. "Kəpəz"in evdə necə oynadığı hamıya bəllidi. Rəqibi təhlil etmişdik. Azər Məmmədov yaxşı komanda formalaşdırıb. Birinci hissədə istədiyimizi etməyə çalışdıq. Futbolçular yaxşı mübarizə apardı. Əlimizə düşən qol imkanlarından maksimum istifadə etdik. İkinci yarıda sığortalı oynamağa çalışdıq. Qapımızda qol gördük. Bu, bizim üçün siqnal olmalıdı. Müdafiədəki boşluqları aradan qaldırmalıyıq".
- Penalti epizodunu necə şərh edərdiniz?
- Hələ epizoda baxmamışam. Hakimlər daha yaxşı bilər. Referi epizoda yaxın idi. Hakimlərin üstünə çox getmək istəmirəm. Gənc hakimdi. Onlara dəstək olmalıyıq.
- Əvəzetmələri etməkdə məqsədiniz nə idi? Oyuna girənlər sanki özlərini göstərə bilmədi...
- Bəli. Daha çox öndə topu özümüzdə saxlamaq istədik. Orxanla Turalın yorğunluğu görünürdü. İstədik ki, qabaqda pressinq edək. Daha çox cinah müdafiəçilərində problem oldu. Onlarla belə danışmamışdıq. Çox yoruldular.
