“Turan Tovuz” Misli premyer-liqasının 11-ci turunda “Kəpəz”ə qalib gəldi. “Football-plus.az” xəbər verir ki, oyunsonrası mətbuat konfransında “Kəpəz”in baş məşqçisi Azər Bağırov jurnalistlərin suallarını cavablayıb.

– Son anlarda xalı əldən verməyiniz nə ilə bağlıdı?
– Son iki dəqiqədə hakim olmayan cərimələri verdi. Baxın, Raufun epizodunda qayda pozuntusu varsa, deməli, mən heç nə demirəm. Hakimlərin adilliyinə inanmıram.

– Qarşıda “Səbail”lə oyun var…
– Komandamda psixoloji problem yoxdu. Uşaqlar futbol oynadılar. Bu gün hər iki hissədə maraqlı mübarizə apardıq. Bizim daha üstün oynadığımızı demək olar. Digər məsələlərin necə olacağını deyə bilmərəm. “Qarabağ”la oyunda da hər epizoda foul verilirdi. Hakimlərə təşəkkür edirəm. Hər şeyin vaxtı var, əsas hakim Allahdı.

– “Qarabağ”la oyunda Romao sizin oyunçunuza zərbə endirsə də, hakim bağışlamışdı. Amma dünən Avropa Liqasında “Ayaks”la oyunda eyni epizod “qırmızı” ilə nəticələndi…
– Bu gün 40-cı dəqiqədə bir epizod var, Avropa Liqasında hansı oyun olsa, həmin epizoda penalti verərdilər. Hər şeyin vaxtı var. Hakimlər öz işlərində olsunlar, görək nə olacaq… “Qarabağ”la oyunda Paçunun ayağını tapdaladılar, penalti verilmədi. Amma Avropa Liqasında cüzi toxunuşa penalti verildi, kimsə danışmadı. Bilirsiz, ötən oyunların birində hakim deyir ki, futbolçunun niyyəti rəqibi vurmaq deyildi. Adama deyərlər ki, sən onun niyyətini hardan bilirsən? Bu nə qədər doğrudu ki, sən onun niyyətindən danışırsan? Sən meydanda 5 dəqiqə futbol oynasan, bilərdin ki, onun niyyəti var idi, ya yox. Gülüncdü.

ƏSƏD SEYİDOV