Mahir Emrelinin Almaniyanın 2-ci bundesliqasında vurduğu qollarla futbol ictimaiyyətinin diqqət mərkəzindədi.

O, “Nürnberq”in heyətində 9-cu turda “Qroyter”, 10-cu turda isə “Regensburq” ilə oyunda fərqləndi. Bəli, Azərbaycan futbol ailəsi üçün Emreli qəhrəmandı, Almaniyada üzümüzü ağ edən bacarıqlı hücumçudu. Lakin...

... Almaniyada belə deyil! Nə baş məşqçi Miroslav Kloze ondan tam razıdı, nə də yerli idman mediası. Haqlı səbəbləri də var. Biz həm media nümayəndəsi, həm də Mahirin sadə həmyerlisi kimi ciddi işlər gördüyünü düşünməkdə haqlıyıq. Buz dağının görünməyən üzü isə “Nürnberq”də və 2-ci bundesliqanın səviyyəsində gizlənir. Məsələn, ölkəmizdə bu sualın cavabını axtaranlar az deyil: görəsən, Kloze Mahiri niyə 90 dəqiqə oynatmır?

“Kicker” məhz bu suala aydınlıq gətirib. Almaniyalı həmkarlarımızın fikrincə, Mahirin meydandan çıxarılmasının səbəbi xeyli qol imkanını boşa verməsidi. Məsələn, digər mərkəz hücumçusu, yunan Stefanos Simas ələ düşən fürsətlərin əksəriyyətini qolla tamamlayır. Emreli təkcə “Regensburq”la matçda qapıya üç zərbədən birində istəyinə çatıb. Onun qeyri-dəqiq cəhdlərinin çoxluğu komanda yoldaşlarını da ötürmə verməkdən yayındırır. Maraqlıdı ki, futbolçuların əksəriyyəti Mahir variantı da olduğu halda, topu Simasla (7 oyun: 5 qol, 1 məhsuldar ötürmə) və Yulian Yustvana (8 oyun: 3 qol, 5 məhsuldar ötürmə) çatdırmağa üstünlük verir.

“Kicker” ardıcıl iki oyunda qol vurmasına baxmayaraq, Mahiri 10 xallıq şkala üzrə 2,5 xalla qiymətləndirib. Nəşr bunu futbolçunun əvəzlənməsiylə və əldən verdiyi qol fürsətləriylə əlaqələndirir.

Görünür, həmyerlimizin yeganə problemi uyğunlaşma ilə bağlıdı. Onun bu yöndə işini asanlaşdıran məsələ isə Klozenin 4-3-3 düzülüşündən istifadə etməsidi. Yəni Mahir özünü yaxşı tərəfdən göstərməyə davam etdikcə, daha çox şans qazanacaq və heyətdə həmişə yeri olacaq. O başqa məsələ ki, hücumçu komanda yoldaşlarının kölgəsində qalmamaq üçün çox çalışmalıdı. Yoxsa ən azı “Nürnberq” azarkeşlərinin qəlbinin dərinliyinə təsir edə bilməsi mümkünsüz görünür. Hələ Almaniyada şöhrət qazanıb, 1-ci bundesliqaya adlamaq perspektivindən heç danışmırıq...

KƏNAN BAHADIR