“Mahir Emreli meydanda olduğu müddətdə çox cəsarətli və baxımlı oyun sərgilədi. O, hələ 7-ci dəqiqədə məshuldar ötürmə müəllifi ola bilərdi. Lakin Yunq onun çatdırdığı topu qeyri-dəqiq zərbə üzündən “çərçivə”yə daxil edə bilmədi. Futbolçu özünü “Nürnberq”in lideri kimi apardı və 13-cü dəqiqədə Yustvan tərəfindən topla təmin edildikdən sonra təkbaşına irəliləyib, təxminən 20 metrdən rəqibin torunu silkələdi. Hücumçu, demək olar ki, hansısa təzyiqə məruz qalmadan sol ayağıyla qapının sol küncünü dəqiq nişan aldı və gözəl zərbəylə komandasını hesabda önə çıxardı. Bundan sonra “Nürnberq” daha da cəsarətləndi və sürəti artırdı. Mahir ikinci hissəyə aqressiv oyunla başladı. “Qroyter”in təzyiqi artırmağa çalışmasına mane olan futbolçu 56-cı dəqiqədə kobudluq etdiyinə görə sarı vərəqə aldı. Miroslav Kloze Mahirin bir neçə rəqib futbolçu tərəfindən sıxışdırıldığını gördü və 62-ci dəqiqədə qırmızı vərəqə almadan meydandan çıxardı”.