Səudiyyə Ərəbistanı kubokunda 1/8 finalın oyunları keçirilir.

Bu mərhələnin əsas sürprizi ''Əl-Nəsr'' ilə ''Əl-Taavun''un oyununda qeydə alındı. Kriştiano Ronaldonun şərəfini qoruduğu ''Əl-Nəsr'' doğma fanatları önündə minimal hesabla uduzaraq mübarizəni dayandırmalı oldu. Qonaqların heyətində 71-ci dəqiqədə Valid Əl-Əhməd fərqləndi. Matçın sonluğu meydan sahibləri üçün dramatik alındı.

Belə ki, əsas vaxta əlavə olunmuş 6-cı dəqiqədə Ronaldo penaltidən yararlana bilmədi! Onun zərbəsi qapının üstündən keçdi. Maraqlıdı ki, bu, portuqaliyalı superulduzun Səudiyyə Ərəbistanı karyerasında qaçırdığı ilk penalti oldu. Buna qədər o, ''Əl-Nəsr''in heyətində 19 penaltinin hamısını dəqiq yerinə yetirmişdi. Ər-Riyad təmsilçisi 2023-ün yanvarından, yəni Ronaldo transfer edildikdən bu yana iştirak etdiyi 9 turnirin yalnız 1-də qalib gəlib. Bu kollektiv ötən il Ərəbistan Çempionlarının Kuboku adlı turnirin qalibi olmuşdu. Hərçənd bu turnir heç də rəsmi xarakter daşımır. Ümumilikdə Ronaldo indiyə qədər ''Əl-Nəsr''də keçirdiyi 75 qarşılaşmada 67 qol, 18 məhsuldar ötürmə ilə fərqlənib.

ƏLİ