Dünən Səudiyyə Ərəbistanı çempionatında 32-ci turun mərkəzi oyununda artıq çempionluğu rəsmiləşdirmiş ''Əl-Hilal'' ən yaxın izləyicisi, Kriştiano Ronaldolu ''Əl-Nəsr''in qonağı oldu.

Bu mövsüm bir sıra rekordları yeniləyən ''Əl-Hilal'' tura məğlubiyyətsiz daxil olmuşdu. ''Əl-Nəsr'' evdə prinsipial rəqibinin bu seriyasını qırmaq niyyətində idi. Ər-Riyad derbisi meydan sahibləri üçün çox uğurlu başladı. Artıq 23-cü saniyədə Ronaldo həmyerlisi Otavionun fərqlənməsinə şərait yaratdı. Amma qələbə qazanmaq və rəqibin seriyasına son qoymaq mümkün olmadı. ''Əl-Hilal''ın cəhdləri yalnız son saniyələrdə - əsas vaxta əlavə olunmuş 10-cu dəqiqədə bəhrəsini verdi. Mitroviç penaltidən fərqlənməklə ''Əl-Hilal''ı məğlubiyyətdən xilas etdi.

Beləliklə, Jorje Jezuşun kollektivi 32-ci turu da məğlubiyyətsiz tamamladı. Ronaldo aktivinə məhsuldar ötürmə yazmaqla diqqətçəkən bir göstəriciyə nail oldu. O, bu mövsüm Səudiyyə Ərəbistanı çempionatında 44-cü qolun vurulmasında yaxından iştirak etdi (33 qol, 11 məhsuldar ötürmə). Bu, turnirin yeni rekordudu! Əvvəlki rekord Abderrazzaq Hamdallaha məxsus idi. Merakeşli futbolçu 2018/19-da yenə də ''Əl-Nəsr''in heyətində çempionatda 43 qolun vurulmasında yaxından iştirak etmişdi (34 qol, 9 ötürmə). 33 yaşlı Hamdallah hazırda ''Əl-İttihad''da forma geyir.

ƏLİ