“Qarabağ” Misli premyer-liqasının 11-ci turunda evdə “Şamaxı”nı böyük hesabla məğlub etdi - 3:0.

“Football-plus.az” xəbər verir ki, “köhlən atlar”ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Vacib qələbə qazandıq. İlk hissədə yaxşı müdafiə olunan komandaya qarşı oynadıq. Rəqibimiz çox sıx və kompakt oyun nümayiş etdirdi. İkinci yarıda açıq oyun getdi. Hər qalibiyyət çempionatdakı yerimizi qorumaq üçün çox vacibdi. Mənə və komandama dəstək olan azarkeşlərə təşəkkür edirəm. Qələbə hamımız üçün çox xoş oldu.

- "Zirə" "Azərsun Arena"da məskunlaşdığı üçün oyun "Tofiq Bəhramov"da keçirildi, yoxsa başqa səbəb var?
- Ot örtüyündə təmir işləri gedir. İki meydançamız var. Bu ay ola bilər ki, həmin meydançalarımız təmir edilsin və oyunları burada keçirək.

- Juninyo cəzalı deyil. Ona istirahət vermişdiz?
- Son oyunda əzələsində ağrı hiss edirdi. Həkimlər risk etməyin tərəfdarı olmadı. Bu üzdən heç heyətə də daxil etməmişdik.

- Penalti epizodu haqda nə deyə bilərsiz? Başqa məşqçilər hakimlikdən çox şikayətçidi. Ədaləyt təmsilçilərinin performansında eniş var?
- Əfsuslar olsun ki, nə qədər futboldan danışılırsa, bir o qədər də hakimlikdən danışılır. Bu, heç yaxşı hal deyil. Dünya futboluna baxsaq, hər yerdə eyni ssenaridi. Bəzən biz də anlaya bilmirik. Elə qaydalar deyirlər ki, görməmişik, eşitməmişik. Çox asan penalti epizodu idi. Son oyunlarda gördüklərimdən sonra, hakimlərə deyəcək sözüm yoxdu. İşlərini görürlər. Hər komanda rəqibə qarşı oyun üslubunu qurur. Hakim oyunçuya sadə sarı vərəqə verir. Sonra yenidən vərəqə göstərir və komanda azlıqda qalır. Planlar pozulur. Futbol mübarizə oyunudu. İstər-istəməz oyun çox dayanır. Temp qalxmalıdı. Çox cüzi vəziyyətdə hakimləri qınayıram. Çünki onların peşəsi çox ağırdı. Həm də kitabla qayda-qanunları var.

- “Qarabağ”ın “Ayaks”la oyununda bəzi epizodlardan bəhs edilir. Bəs siz həmin epizodları müzakirə edirsizmi?
- Hər dəfə oyunumuzu analiz edirik. Başqa müzakirələrdən uzaq oluram.

- Avropa Liqasındakı ardıcıl üç məğlubiyyət komandada ruh düşkünlüyünə səbəb olubmu?
- İstənilən məğlubiyyətdən sonra ruh düşkünlüyü olur. Mübarizəmiz ilboyu davam edir. Bele hallarla hər il üzləşirik. Məğlubiyyətləri düzgün qəbul edirik. İnanıram ki, qarşıdakı oyunlarda bizim üçün psixoloji problem olmayacaq. Növbəti oyunlara hazırlaşacağıq.

- Avropa Liqasındakı rəqiblərinizi təhlil etməyə başlamısız?
- Bütün rəqiblərin oyunlarına baxmışam. Hər biri haqda məlumatım var. Həmin matça hazırlaşdığımız müddətdə tam analiz edəcəyik.

- Maksimum nə qədər xal toplamaq fikriniz var? Hədəfləriniz nədi?
- Hədəfimiz növbəti oyuna hazırlaşmaqdı.

ƏSƏD SEYİDOV