Srağagün və dünən futbol üzrə ölkə çempionatının 1-ci liqasında 6-cı turun oyunları keçirildi.

İlk matçda “Mingəçevir”i qəbul edən “Cəbrayıl” böyükhesablı qələbə qazandı – 3:0. Qarabağlılar turnir cədvəlindəki mövqeyini yaxşılaşdırdısa, qonaqlar irəliləmək şansını növbəti dəfə əldən verdi. Binə qəsəbə stadionunda aparılan təmir-bərpa işləri üzündən ev oyununu Lökbatanda keçirən MOİK isə arzuolunmaz məğlubiyyətlə üzləşdi. Daha doğrusu, lider “Karvan”ı ordu klubu da dayandıra bilmədi. Yevlaxlılar iki top fərqini 4 dəqiqədə aradan qaldıran meydan sahiblərinə 90+1-ci dəqiqədə vurduğu qolla qalib gəlib qələbə seriyasını 6-ya çatdırdı! Növbəti matçda leysan yağışları üzündən ev oyunuyla səfər matçının yeri dəyişdirilən “Baku Sportinq” “Qaradağ Lökbatan”ın qonağı oldu. Son dəqiqələrə qədər meydan sahibləri qələbəyə çox yaxın idi. Lakin qonaqların ardıcıl iki dəfə fərqlənməsi məğlubiyyəti qaçılmaz etdi. Nəticədə Lökbatan təmsilçisi 6-cı turda da qələbəyə həsrət qaldı.
Turun 4-cü matçını Şamaxıda izlədik. Bu oyunda sürpriz nəticə qeydə alındı. “Difai” “Zaqatala”ya mövsümdəki ilk məğlubiyyətini yaşatdı.

Tura bu gün keçirilən “Qəbələ” – “İmişli” görüşüylə yekun vuruldu. Komandaların çempionluq uğrunda mübarizə apardığını nəzərə alsaq, gərgin matça şahidlik edəcəyimizi deyə bilərdik. Belə də oldu. Sadəcə, komandalar əvvəldən sona qədər bəxtini sınasa da, hesab açılmadı və hərəyə bir xalla kifayətləndilər. Beləliklə, "Qəbələ" lider "Karvan"dan nə az, nə çox 4 xal geridədi!

24 oktyabr
Cəbrayıl – Mingəçevir 3:0
Xəyal Xudaverdiyev, 45+1-öz qapısına. Okan Təhməzli, 59. Taleh Qarayev, 90+3.

MOİK – Karvan 2:3
Nurlan Bayramov, 83. İbrahim Əliyev, 87-p. - Bəhruz Teymurov, 24; 64. Emil Qasımov, 90+1.

25 oktyabr
Qaradağ Lökbatan – Baku Sportinq 2:3
Ramin Məhərrəmli, 53. Araz Abdullayev, 64 - Şahin Balejai, 21. İsa Zeynallı, 78; 83.

Difai – Zaqatala 3:1
Xəyyam Məmmədli, 28. Muhamməd Alfa, 45+1. Emil Quluzadə, 80 – Roini İsmayılov, 88.

26 oktyabr
Qəbələ - İmişli 0:0

Xal durumu: Karvan – 18, Qəbələ - 14, Zaqatala – 11, Cəbrayıl, İmişli – 10, Baku Sportinq – 7, MOİK – 5, Difai, Mingəçevir – 4, Qaradağ Lökbatan – 1.

Bombardir: Bəhruz Teymurov (Karvan) – 8.

KƏNAN BAHADIR