Futbol üzrə ölkə çempionatının 1-ci liqası turlar ötdükcə diqqəti daha çox üzərinə keçir.

Liderlik uğrunda gərgin mübarizə gözlənilməz nəticələrin qeydə alınmasıyla müşayiət olunur. Maraqlıdı ki, bu dəfə də “Karvan”, “Zaqatala” və “Qəbələ”nin toru silkələnmədi!

Oyunlara gəlincə, ardıcıl ikinci oyunda, üstəlik “doğma divarlar” arasında xal itirmək “Cəbrayıl” üçün pis sürpriz oldu. Premyer-liqaya yüksəlmək istəyən “İmişli” iki cavabsız qol sayəsində istəyinə çatdı. MOİK – “Difai” matçında isə ağsuluların birinci hissədə iki dəfə fərqlənməsi meydan sahibləri üçün “soyuq duş” effekti yaratdı. Düzdü, ordu klubu ikinci yarıda toparlandı və qolların əvəzini çıxdı. Lakin heç-heçə Qəzənfər Abbasovun komandası üçün sərfəli nəticə deyil. Hər halda, çempion olmaq hədəfiylə ilk üç turda qələbəyə həsrət qalmaq uzlaşmır. Hələ ki həmin məqsədi büruzə verən “Karvan”dı. Özü də dildə yox, əməldə. Büdrəmədən yola davam edən yevlaxlılar evdə iddialı “Baku Sportinq”ə qalib gəlməklə liderliyini möhkəmləndirdi.

Ümumiyyətlə, “Karvan” həm nəticələriylə, həm də doğma meydanda gördüyü ciddi azarkeş dəstəyiylə mövsümün ən iddialısına çevrilir. Elman Sultanovun komandası isə ortababların sırasında qərarlaşmaqdadı. Əşi, üzülməyin. Çox güman ki, “Qaradağ Lökbatan” “Baku Sportinq”in yerində olmaq istəyərdi. Heç olmasa, bir qələbə, bir heç-heçə... Heç olmasa, bir qol... Bəli-bəli, Azər Həşimovun komandası bu dəfə də bacarmadı. Lökbatanlılar “Zaqatala”nın meydanında böyük hesabla uduzdu, turnir cədvəlinin yalnız məğlubiyyət xanasında artıma nail oldu. Heyətin kasadlığını nəzərə alsaq, durumun düzələcəyinə inam azdı. Turun son matçında “Qəbələ” “Mingəçevir”i məğlub etdi. “Qırmızı-qaralar” qələbə sayəsində “Karvan”ın ən yaxın izləyicisidi.

Yeri gəlmişkən, bu, "Qəbələ"nin tarixindəki 700-cü oyun idi. “Qırmızı-qaralar” premyer-liqada 540, ölkə kubokunda 85, avrokuboklarda 42, 1-ci liqada 33 qarşılaşmada qüvvəsini sınayıb. Onlar 284 qələbə qazanıb, 177 heç-heçə edib və 239 dəfə uduzub. 902 qol vuran bölgə təmsilçisi 794 top buraxıb.

1. Karvan 3 3 0 0 7-2 9
2. Qəbələ 3 2 1 0 7-0 7
3. İmişli 3 2 0 1 7-2 6
4. Zaqatala 3 1 2 0 4-0 5
5. Baku Sportinq 3 1 1 1 3-4 4
6. Cəbrayıl 3 1 1 1 1-2 4
7. Mingəçevir 3 1 0 2 3-6 3
8. MOİK 3 0 2 1 3-4 2
9. Difai 3 0 1 2 2-7 1
10. Qaradağ Lökbatan 3 0 0 3 0-10 0

Bombardirlər: Bəhruz Teymurov (Karvan) – 4, Domi Massumo (Qəbələ) – 3.

Növbəti turun oyunları oktyabrın 2-4-də keçiriləcək: Cəbrayıl – Qaradağ Lökbatan, Difai – Karvan, Mingəçevir – Zaqatala, İmişli – MOİK, Baku Sportinq – Qəbələ.

KƏNAN BAHADIR