Sentyabrın 18-19-da futbol üzrə ölkə çempionatının 1-ci liqasında 2-ci turun oyunları keçirildi. Turun ən önəmli məqamı kimi meydan sahiblərinin qələbəyə həsrət qalmasını qeyd edə bilərik.

Ötən həftə "Qəbələ"nin meydanından xalla qayıdan "Zaqatala" bu dəfə "Cəbrayıl"a həmin aqibəti yaşatdı. Belədə qarabağlıların ab-havası ilk ev oyununda korlandı. Aran derbisinin qalibi isə "Karvan" oldu. "Mingəçevir"in baş məşqçisi Ədəhim Niftəliyev etiraf edir ki, yevlaxlı azarkeşlər üzündən özünü "Karvan"ın meydanında hiss edib. Məhz belə əhval-ruhiyyə "nur şəhəri"nin təmsilçisini məğlubiyyətlə üz-üzə qoydusa, ikinci qələbəsini qazanan "Karvan" liderliyə yüksəldi. Mərkəzi oyundan da bəhs edək. O matç ki, "Qəbələ" ilk turda yaşadığı “qol aclığını" çempionluq uğrunda mübarizə aparan "Qaradağ Lökbatan" sayəsində doyurdu. İddialı rəqibin meydanında beş cavabsız qolla qələbə qazanan "qırmızı-qaralar" hələ ki mövsümün ən böyükhesablı qələbəsinə müəlliflik etdi. İndi Lökbatan təmsilçisi turnir cədvəlinin sonuncu pilləsindədi. Necə olacaq bu işlərin axırı, Azər Həşimov?!

"Baku Sportinq" - MOİK matçına gəlincə, gözü premyer-liqada olanların duelində qalib müəyyənləşmədi. Tura "İmişli"nin "Difai" üzərində parlaq qələbəsiylə yekun vuruldu. Görünür, yeni baş məşqçi Adil Mahmudov Ağsu təmsilçisinin ümumi durumuna tezliklə müdaxilə etməsə, bu mövsüm də ciddi problemlər yaşanacaq. Fərid Namazovun komandası isə dörd cavabsız qol vurmaqla həm "Baku Sportinq"ə məğlubiyyətin üzüntüsündən xilas oldu, həm də növbəti oyun üçün ruh yüksəkliyi qazandı.

1. Karvan 2 2 0 0 4-1 6
2. Qəbələ 2 1 1 0 5-0 4
3. Baku Sportinq 2 1 1 0 2-1 4
4. Cəbrayıl 2 1 1 0 1-0 4
5. İmişli 2 1 0 1 5-2 3
6. Mingəçevir 2 1 0 1 3-4 3
7. Zaqatala 2 0 2 0 0-0 2
8. MOİK 2 0 1 1 1-2 1
9. Difai 2 0 0 2 0-5 0
10. Qaradağ Lökbatan 2 0 0 2 0-6 0

Bombardir: Bəhruz Teymurov (Karvan) – 3.

Növbəti turun oyunları sentyabrın 25-26-da keçiriləcək: Cəbrayıl - İmişli, MOİK - Difai, Karvan - Baku Sportinq, Zaqatala - Qaradağ Lökbatan, Qəbələ - Mingəçevir.

KƏNAN BAHADIR