Üç gün ərzində keçirilən oyunlarla futbol üzrə ölkə çempionatının 1-ci liqasında 20-ci tur arxada qaldı.

“İmişli”nin səfərdə “Mingəçevir” üzərində çətinliklə qazandığı qələbədən bəhs etmişdik. Həmin 3 xal Əsgər Abdullayevin yetirmələrinin ikinci pillədəki yerini qorumasına səbəb oldu. Növbəti oyunda “Difai Ağsu” evdə lider “Qaradağ Lökbatan”ın ciddi təzyiqinə tab gətirə bilmədi. Birinci hissədə bərabərliyi təmin edən meydan sahibləri 2-ci hissədə buraxdığı qol üzündən məğlub oldu. Azər Həşimovun komandası qalib gəldiyindən nəinki şəriksiz lider oldu, ən yaxın izləyicisi “İmişli”ni də 3 xal qabaqladı.

Turniri tərk etmək təhlükəsindən xilas olmaq istəyən “Araz Saatlı” növbəti böyükhesablı qələbəylə hədəfə yaxınlaşdı. Rüfət Quliyevon çalışdırdığı komanda səfərdə “İrəvan”ı 4:1 hesabıyla məğlub etməklə ümidinə ümid qatdı. Qərbi Azərbaycan təmsilçisindən isə danışmağa dəyməz. Komandanın ən zəifə uduzması çox söz deyir. Hələ qolların qəribə tərzdə buraxılmasını demirik...

“Karvan” “Zaqatala” ilə səfər oyununda hesabda önə çıxsa da, məhz qolun müəllifi Akif Tağıyevin meydandan qovulması üzündən 54-cü dəqiqədə azlıqda qaldı. Belədə meydan sahibləri hesabı bərabərləşdirə bildi. Hər halda, Kənan Kərimovun komandası çempionluqdan əlini üzmək üzrədi. Tura güclülərin dueliylə yekun vuruldu. MOİK – “Şamaxı” oyununun taleyini penalti həll etdi, “şirlər” minimal qələbə sayəsində liderlərin təqibini davam etdirir.

1. Qaradağ Lökbatan 20 12 6 2 35-14 42
2. İmişli 20 11 6 3 29-11 39
3. Şamaxı 20 10 8 2 41-16 38
4. MOİK 20 11 5 4 40-20 38
5. Karvan 20 8 5 7 25-25 29
6. Zaqatala 20 5 8 7 25-26 23
7. İrəvan 20 7 2 11 21-38 23
8. Mingəçevir 20 6 3 11 15-29 21
9. Difai Ağsu 20 3 4 13 20-36 13
10. Araz Saatlı 20 3 1 16 22-58 10
Bombardirlər: Elşad Tağıyev (Şamaxı), Elmir Rəhimzadə (MOİK) – 12, Seyxan Fərəcov (Qaradağ Lökbatan) – 10.

Növbəti turun oyunları aprelin 10-11-də keçiriləcək: Araz Saatlı – Difai Ağsu, İmişli – İrəvan, Şamaxı – Mingəçevir, Karvan – MOİK, Qaradağ Lökbatan – Zaqatala.

KƏNAN BAHADIR