Ötən ay Türkiyə futbol ictimaiyyətinin gündəmini zəbt edən bir olay yenidən, amma bu dəfə fərqli formada gündəmə gəlib.

Bilindiyi kimi, “Qalatasaray”ın “meritking.news” adlı xəbər saytı ilə sponsorluq anlaşması müzakirələrə səbəb olmuşdu. İstanbul nəhəngi formasının arxasına bu saytın adını yazmış və daha sonra bu anlaşmadan illik 14 milyon avro qazanacağını açıqlamışdı. Amma çox keçmədən “Cim-Bom” rəhbərliyi anlaşmanı ləğv etməli olmuşdu. Çünki eyni adla qeyri-qanuni şəkildə fəaliyyət göstərən bukmeker saytı da mövcud imiş.

İndi də məlum olub ki, bu qeyri-qanuni saytın Türkiyədə əsas dəstəkçisi olan “Donanım Medya” qardaş ölkədə futbolun söz sahibi olan Türkiyə Futbol Federasiyası ilə anlaşıb! Belə ki, “Donanım Medya” Türkiyə yığmasının matçlarında led reklam haqlarına sahib çıxaraq ora öz reklamını yerləşdirib. Elə Türkiyə - Monteneqro qarşılaşmasında da stadionun kənarındakı led reklam lövhələrində tez-tez bu şirkətin adına rast gəlmək mümkün idi.

Qeyd edək ki, bu şirkət “Qalatasaray”dan başqa “Sivasspor” və “Adana Dəmirspor” ilə də əməkdaşlıq edirdi. “Antalyaspor”la isə əməkdaşlığa başlamaq istəyərkən Antalya valisi son anda buna mane olmuşdu. “Qalatasaray”la yaşananların ardından digər klublarla da anlaşma dərhal ləğv edildi. Gənclər və İdman Nazirliyinə bağlı olan “Spor Toto” təşkilatı isə qeyri-qanuni bukmeker saytlarını ölkəyə gətirən, eləcə də ölkədə təbliğ edənlərin hamısından məhkəməyə şikayət edildiyini açıqlamışdı. Yəni faktiki Türkiyədə qeyri-qanuni mərc saytlarını “Donanım Medya” təbliğ etdiyi halda, ortada çox qəribə mənzərə yaranıb.

Bir tərəfdən Gənclər və İdman Nazirliyi bu şirkəti məhkəməyə veribsə, digər tərəfdən həmin şirkət TFF ilə anlaşma əldə edib.