Şakira ilə ayrıldıqdan bu yana adı gündəmdən düşməyən Xerar Pike bu günlərdə maraqlı bir təklif alıb.

Bilindiyi kimi İspaniya yığmasının və ''Barselona''nın sabiq müdafiəçisi İspaniyanın 3-cü divizionunda çıxış edən ''Andorra''nın sahibidi.

"Football-plus.az" xəbər verir ki, qeyri-rəsmi münasibətlər üçün tanışlıq platforması olan ''Ashley Madison'' öz loqotipini ''Andorra''nın formasının üzərində yerləşdirmək istəyir.

İlk baxışdan bu, trollinq kimi görünsə də, sayt bunun qarşılığında Pikeyə 1 ilə 1 milyon avro olmaqla 3 illik müqavilə təklif edib! Saytın sahiblərinin iddiasına görə onlar son aylarda Pikenin həyatında baş verənləri analiz etdikdən sonra belə qərara gəliblər ki, sabiq müdafiəçi ilə işbirliyi qurmaq onlar üçün ideal variantdı.

Başqa sözlə desək, qeyri-rəsmi münasibətləri təbliğ edən sayt ''Andorra''nın baş sponsoru olmaq istəyir. Saytın loqosu tək formanın üzərində yox, mətbuat konfranslarının keçirildiyi məkanda, mikrofonların üzərində, avtobusun üzərində, meydanın kənarındakı reklam lövhələrində, qısası hər yerdə olmalıdı. Amma ən maraqlı məqam bonuslarla bağlıdı.

Sayt vurğulayır ki, rəsmi şəkildə birdən artıq xanımla münasibətdə olduğunu açıqlayan ''Andorra''nın hər futbolçusuna 50 min avro bonus veriləcək! Xanımlardan birini sayt vasitəsi ilə tapdığını sübut edən futbolçuya isə hətta 150 min avro bonus nəzərdə tutulub. Saytın təklifi martın 15-nə qədər qüvvədə qalacaq.

Sizcə, Pike razılaşacaqmı?

Əli